Richard Kramers tabata den corte pa un caso cu el a entama contra gobierno. E resultado di esaki a sali na su fabor, unda el a gana su caso. Si ta bay apela of no e decision, gobierno a tuma e decision di manda un carta pa inform’e cu e tin di traha bek cu Cuerpo Policial.
Minister di Husticia y Asuntonan Social, Rocco Tjon, a indica cu su persona no gusta comenta riba caso specifico. El a sigui indica cu e ta kere cu ta keda na cada persona si e kier reacciona riba su caso.
Si Kramers ta bay bek na su posicion, e mandatario a expresa cu Kramers a haya un carta unda ta bis’e cu e mester cuminsa bek cu su tareanan na Cuerpo Policial.
E caso
Den luna di augustus 2022 Kramers a lanta caso contra Minister di Husticia y Asuntonan Social, Rocco Tjon, pero tambe contra di Prome Minister mr. Evelyn Wever-Croes. Hues a duna su sentencia den luna di mei 2023. Aki hues a dicta na fabor di Kramers. El a lanta caso riba e “bezwaar” contra e decisionnan di Veiligheids Dienst Aruba (VDA), den su afan pa defende su nomber, imagen y integridad! Na mei corte a tuma un decision final y a destrui carta di prome minister, den cual e ta skirbi, riba conseho di director di VDA, cu Richard Kramers no por ocupa e funcion di director di Guarda nos Costa pasobra e no a pasa su prueba di siguridad (integridad).
Gobierno a apela y un biaha mas a perde y cu esey Kramers mester bay bek na su trabou.
E acusacionnan
Di acuerdo cu e rapport di VDA, tin dos asunto serio cu ta stroba Richard Kramers pa ta den funcion di director. Un ta cu e lo a bay un biaha na Banco Central, bisti den uniform di polis y cu su arma reglamentario den banda y a purba pone presion pa e drenta paden pa e por a papia cu un ehecutivo di e banco pa atende un asunto di su compania priva di transporte di placa. E di dos ta cu e lo tabatin un discusion formal cu un miembro di siguridad na aeropuerto y cu ey el a mal uza su funcion di director di Guarda nos Costa, debi cu a takel auto di su compania di siguridad, cu tabata mal parkeer dilanti di e edificio di aeropuerto.
