E talentoso saxofonista y studiante di ArtEZ Conservatorium, Camilo Bastidas tabata preparando pa un concierto di graduacion na Arnhem, un eventocu a priminti di ta un espectaculo inolvidabel di musica Latina,Jazz y Salsa. Diahuebs anochi, Camilo a ofrece un presentacion cu a laga un marca imborabel cerca tur cu a presencia.
Un soño cumpli
Camilo mes a describi e experiencia como algo increibel y sorprendente. El a expresa cu entusiasmo cu el a supera su expectativanan cu e presentacion y cu el a sinti inmensamente feliz p’e resultado. “Tabata un experiencia increibel, algo cu nunca mi a imagina. Mi ta sinti mi hopi contento, El a sali miho cu m’a spera. Hopi hende a bin duna sosten,” el a comenta.
Un esfuerso colaborativo
E concierto di Camilo no tabata posibel sin e colaboracion di un gran cantidad di persona. Den e banda tabatin 19 miembro (incluyendo Camilo), fuera di e bailarinnan y e ekipo tras di stage, tanto di e scol como di e organisacion di e evento. Camilo a destaca e importancia di tur di nan p’e exito di e concierto.
Tema original y cover
E repertorio di e concierto a inclui tanto tema original como cover di varios cancion significativo pa Camilo. Tabata un momento special p’e, ya cu el a presenta pa prome biaha den publico algun di su composicionnan original, compaña p’e 18 musiconan. “E tabata un honor hopi grandi,” Camilo a bisa.
Un cancion special na Papiamento
Un di e momentonan mas emotivo di e anochi tabata e interpretacion di un cancion na Papiamento. E cancion aki, basa riba un poema cu Camilo a skirbi aña pasa y dedica na su tata, tabatin un significado hopi special p’e. “Ta unj cancion hopi cerca dimi y cu a touch mi profundamente cada bes cu mi toc’e. Mi tabatin e honor cu e personanan cu nunca a scucha Papiamento den nan bida a toca e cancion manera nada,” el a splica.
Platano caro: Un toke di nostalgia
Otro cancion destaca di e concierto tabata “Platano Caro”. Camilo a comparti cu e cancion aki ta inspira den algo asina simpel manera e banana na Aruba, un alimento normal cu na Hulanda ta converti den algo exotico y caro. E cancion aki ta representa con algo ordinario por transforma cu un toke special den un contexto diferente.
Plannan pa futuro
Mirando pa futuro, Camilo tin planea pa tuma un tempo pa disfruta y sink in e experiencia biba. Despues di zomer, e lo cuminsa cu su masters na Rotterdam, un paso cu e ta spera ansiosamente, “P’awo, mi lo bay disfruta loke a pasa. Mi lo laga pa tur cos sink in, ya cu lo bay tuma un tempo p’esaki. El a touch mi hopi,” el a expresa.
Gradicimento
Camilo tin hopi hende pa gradici. Aunke e kier a pasa door di un lista completo diahuebs anochi, p’aworaki e kier a gradici su mama, su ruman, su famia y tur hende na Aruba cu ta pendiente di su conciertonan. “Danki na tur,” el a conclui.
E concierto di Camilo Bastidas na Arnhem tabata mas cu un evento musical; e tabata un homenahe na su reisnan y un celebracion di sutalento, rondona p’e sosten di su comunidad y su sernan keri.
