A pesar di e fuerte recuperacion di economia di Aruba, presupuesto ta mustra tanto pa 2022 como pa 2023, un deficit. Tumando na consideracion e tarea inmenso di refinanciamento cu Aruba tin pendiente pa e proximo añanan y e interes creciente, ta di gran importancia pa Aruba logra un surplus for di 2023 pa por reduci e debe publico di AWG 5,9 biyon. Pa realisa esey, ademas di aumento den entrada, mester reduci e gastonan structuralmente. Den tal caso reforma den cuido di salud, e sistema fiscal y seguridad social ta crucial y inevitabel.
Berdad ta cu e bista plurianual, manera presenta den e proyecto di ley di presupuesto di 2023, ta presenta surplus for di 2024, pero no a duna contenido na nan cu medida concreto. Si no tuma na consideracion e sumanan aki, cu tin un obhetivo imperativo, Aruba lo cumpli cu e norma di un surplus di minimal 1 porciento di e PIB apenas na 2027. Den e caso ey e debe publico nominal lo sigui aumenta te na 2026.
Teniendo na cuenta e interes creciente y e refinanciacionnan considerabel den e proximo añanan, Colegio di supervision financiero di Aruba (CAft) ta keda insisti riba e importancia di realisa un saldo financiero di minimal 1 porciento di e PIB for di 2023.
E proyecto di ley di presupuesto di 2023 no ta cumpli cu e rekisito ey. Aruba ainda lo mester haci esfuerso considerabel pa realisa e surplus presupuestario ey structuralmente den e proximo añanan. CAft a duna varios recomendacion al respecto durante e aña cu a pasa y ta constata cu no a sigui nan suficientemente. Asina, por ehempel, a pesar di un reduccion incidental na 2022, e gastonan pa producto y servicio structuralmente ta sigui ta halto compara cu realisacion den e añanan prome cu pandemia. Te ainda no a splica suficientemente e necesidad di aumento di e gastonan.
E aumento di tarifa di Impuesto riba Volumen di Benta (BBO) cu 1 porciento lo intensifica e efectonan di evasion y e riesgo di incumplimento. Ta di suma importancia pa Aruba introduci un sistema di impuesto indirecto solido y husto prome cu dia 1e. di januari 2024.
Door di tardansa pa introduci e lista positivo di remedi y articulo di verband y door cu no a introduci contribucion propio e gastonan di cuido di salud ta keda halto y AZV ta premira un resultado negativo pa 2022 y 2023. Ta importante pa ehecuta e economisacion planea a corto plaso pa evita un deficit y cu esey un posibel aporte di Pais Aruba.
Pa e relato completo, lesa edicion di TREMPAN
