Miguel Mansur como lider di fraccion di Accion 21, a duna di conoce dialuna mainta cu tin tres motibo pa cual no ta participa den e reunion publico pa tratamento di presupuesto 2023 pa Pais Aruba. “E prome ta cu Raad van Advies no a duna un conseho riba e presupuesto actual, pero riba e version prome cu ta inclui BTW. E di dos ta cu CAFT tampoco a duna su conseho riba e presupuesto actualisa y coalicion ta propone pa haci esey despues cu parlamento aprob’e. Y por ultimo ta violando tambe e ley di LAFT. Parti di e trabou como parlamentario ta pa mantene e orden constitucional, sigui nos leynan y controla gobierno. Coalicion ta violando nos orden costitucional y proceduranan di parlamento
E reforma fiscal tabata gran parti di e entrada cu Gabinete Wever-Croes II tabatin presupuesta pa proximo aña. Unabes cu a cambia e modelo pa BBO, Raad van Advies mester bolbe pasa door di dje.
CAFT no a haya chens pa revisa y duna un conseho riba e presupuesto actual. Esey ta algo cu Mansur a trece dilanti den e seniorenconvent y presidente di Parlamento y miembronan di coalicion a bisa cu CAFT por wak e despues. Sinembargo, pa Parlamento por haci su trabou, mester tin e consehonan di CAFT y Raad van Advies. “Ta increiblemente importante pa nos por haci nos trabou,” Mansur a indica.
E Landsverordening Aruba Tijdelijk Financieel Toezicht (LAFT) ta stipula e normanan cu e presupuesto mester cumpli y no tin exoneracion pa 2023 pa desvia di e normanan. Como tal, e presupuesto presenta aworaki tampoco ta den cumplimento cu e LAFT.
