Manera ta conoci, delegacion di College Aruba Financieel Toezicht (CAFT) tabata na Aruba e siman aki y a realisa varios encuentro cu stakeholders. Entre nan a reuni cu Minister di Finanzas. Miembro di CAFT, Hans Hoogervorst den entrevista exclusivo, a duna di conoce cu ademas di a expresa su preocupacion pa echo cu no ta continua cu introduccion di BTW manera a keda acorda, a puntra Gobierno di Aruba pa evalua e posibilidad di cobra BBO na frontera; kier men ora e drenta Aruba.
E alto funcionario Hulandes a califica BBO como un ‘lekker belasting’ pa motibo cu hopi compania, particularmente hotel, por evadi e impuesto aki facilmente door di importa directamente di exterior, anulando e agencia local distribuidor di producto. Hoogervorst a comenta cu ta bin cu containernan yen pa asina no mester paga BBO.
“Esey ta nifica cu e impuesto aki ta cay riba e ciudadano comun y menos riba esunan cu ta mas duro para den capital. P’esey mi ta haya hopi lamentabel cu e reforma no a bay door y mi a puntra gobierno di Aruba pa considera aplica un medida di emergencia caminda ta cobra e impuesto na entrada, pa asina mengua e comportacion di evasion,” Hoogervorst a declara diabierna merdia.
Sin specifica si e ta comparti e opinion di sector comercial na Aruba, e ta considera cu ta hopi logico cu ta cobra e belasting na frontera, si bo ta ripara cu ta facil pa evita di paga esaki door di importa directamente for di exterior. A splica cu esey ta desbentahoso pa e sector comercial si e ciudadano Arubiano ta keda ordo cosnan riba Amazon y e no ta paga BBO riba dje.
“E ta un alternativa competitvo pa e comerciante local cu si mester tene cuenta cu BBO. Mi por imagina mi cu esey ta fastioso,” el a finalisa bisando. Entre e reunionnan cu CAFT a tene riba dianan 20 y 21 di october, a inclui un encuentro cu Aruba Hotel & Tourism Association (AHATA).
