Diamars atardi alrededor di 5:30 pm ambulance a presenta den Maracastraat p’un caso caminda cacho a morde un peaton. Ta trata di e caya paralelo cu Watty Vos Vos Boulevard.
Ambulance a bay den accion mesora p’asina brinda e victima atencion medico. A stablis’e na sitio mes pa djey sali cu ne hospital p’e ricibi atencion medico mucho mas avansa.
Na sitio a combersa cu un familiar di e victima. El a conta cu un rato prome nan tabata combersa den cura y tabata pensa di bay misa un rato. No a dura mucho cu un amigo di e victima a pasa cas y invit’e pa nan “dal un bocht” den bario mes. Asina cu el a lora skina, un cacho a sali y atac’e mesora. A mord’e na man y pia.
A notifica polis tambe di e situacion aki, kende nan na turno lo pasa e caso pa polis di bario kende lo busca pa sa di ken e cacho ta, dado caso un multa lo ta na su luga.
