Grupo di Aruba Doet a yega na Linear Park pa sigui cu nan proceso di registracion di boluntario pa e proyectonan cu tin e aña aki. Otro siman diabierna y diasabra lo tuma luga Aruba Doet 2021.
Paulien ter Meulen, boluntario di Aruba Doet y Cede Aruba, ta invita henter pueblo di Aruba pa participa den e Aruba Doet 2021. Nan mester di hopi ayudo, pasobra ainda falta mas of menos 800 boluntario. Tin diferente tipo di trabou, no ta verf so. Pero mester di hende cu ta verf, metsla, carpinte.
Tambe mester persona pa proyecto social. Ter Meulen a bisa cu por subi riba e website www.arubadoet.com y ey e persona por scoge e proyecto cu e gusta. Por scoge pa participa sea diabierna of diasabra pa algun ora. Ta pidi pa yuda Aruba Doet, pero tambe e comunidad di Aruba.
Orario di e proyectonan lo ta diferente, pasobra tin ta cuminsa 7:00 am, 8:00 am pero tambe den oranan di atardi. Si un persona cu kier participa y no por riba diabierna, e por participa den Aruba Doet 2021 riba diasabra.
Door di e situacion di pandemia, nan a purba haci e proyectonan pafo y p’e gruponan no ta hopi grandi. Si nan ta haci trabou paden, pa haci uzo di tapaboca. Tur organisacion a haya esey tambe for di Oranje Fonds, hand sanitizer y tur cos. Loke ta mas primordial ta pa sigui e reglanan di DVG. E ta invita un y tur pa subi website di Aruba Doet y duna un par di ora pa yuda hopi organisacion, cu lo bay ta hopi contento.
