Burger King a habri su localidad nobo den Playa y esaki ta situa patras di KFC, esta Kamerling Onnestraat. Pa lunanan e team a traha duro y awo ta den e localidad nobo.
Johana Jacobs, representante di marketing, a splica cu e luga ta amplio, tin un concepto completamente nobo y diferente. Tambe Burger King tin un concepto diferente y nobo p’e area di Caribe. Burger King di Aruba ta e prome tienda cu a habri cu e imagen nobo, logo nobo y ta haci primicia di esey. E concepto ta uno diferente na loke Burger King ta custumbra, pasobra e ta mas amicabel pa famia.
E compania ta haci innovacion, ta bin cu variacion di galiña, di e hamburger, y pesey Jacobs a expresa pa tur hende keda pendiente di tur loke nan ta biniendo cu ne. E orario di Burger King ta di 7:00AM te 10:00PM, unda cu e comunidad por pasa busca su desayuno. Mientrastanto pa ora di lunch esaki ta cuminsa pa 11:00AM.
Burger King ta percura pa sigui e reglanan di DVG. A percura pa pone e flechanan, hand sanitzer y tur esaki pa clientenan sinti nan mes sigur ora di yega cerca nan. Tambe a pone cua banda clientenan tin di drenta y sali. El a expresa cu pronto lo habri bek e localidad di San Nicolas, cual na e momentonan aki ta den renobacion cu e mesun concepto.
E imagen nobo di Burger King ta Ivo Yanez, kende ta un persona hopi conoci den medionan social y radio. Pa Yanez esaki ta un aventura p’e y ta pas cu e concepto di su programa y imagen. E ta contento di ta forma parti di team di Burger King.
