Manera tabata di spera, e hecho cu mr. Roland Tuitt RA a bini for di tempo di ex-Minister Alex Schwengle, cu gobierno lo haci tur posibel pa “bula su cabes”. Pero e prome gabinete no a logra pasobra nan no por a cambia e Hunta di Supervision. Apenas nan a logra awor den e di dos termino di Gabinete Wever-Croes, cu awor si a logra tin mayoria den e “board” pa por tuma un decision asina. Desde awe a prohibi entrada di Tuitt na tur facilidad di Fundacion Lotto pa Deporte.
Manera ta conoci, Tuitt a tuma maneho di e fundacion over dia 1 di september 2020, despues cu mester a kibra relacion di trabou cu e ex-director, Di-Stefano Wernet, pa malversacion y estafa cu plac’i lotto. El a firma un acuerdo pa paga cierto suma bek y sobra a yega na un areglo cu ne pa e por bay. El a purba aplica e mesun “modus operandi” di Endy Croes, esta bira presidente di e fundacion prome y despues baha for di Hunta di Supervision y bira director. Na final el a termina mescos Endy Croes, sin trabou!
Roland Tuitt a studia pa accountant na Merca y na Hulanda. E ta poco hende cu tin ambos titulo, logra na ambos pais. Despues di a bin Aruba, e no a aplica su titulo di RA mas y a lag’e bay. Prome cu bin Aruba, el a ocupa e puesto di Minister di Finansa na Sint Maarten. E mes ta di Aruba y henter su infancia y hubentud el a biba na Savaneta.
“Mi no por contesta ningun pregunta ainda. Mañan mi ta reuni cu mi abogado y despues di esey mi lo laga bo sa. Danki pa compronde pa mi”, asina Roland Tuitt a contesta nos pregunta, relaciona cu su suspension. Ki motibo e Hunta di Supervision a uza pa mand’e cas ainda no ta conoci. Pero gobierno tin un sed enorme pa yega na placa y via Fundacion Lotto pa Deporte ta por lo menos un metodo. Sinembargo, mescos cu a sosode na WEB, Utilities, Elmar, RDA, departamento di CBS y otro, ta purba inventa un motibo valido, pa na final paga e director un “golden handshake” pa bay cas. Na final ta placa cu no ta bay pa deporte, cu lo mester bay awo pa paga director persigui politicamente.
Fundacion Lotto pa Deporte ta portado di e licencia pa organisa loteria na Aruba. Nan ta maneha, den un bon aña, te cu 50 miyon florin. Pero nan ta tres empleado so, un director, un secretaria y un persona di limpiesa. Lotto tin un acuerdo cu Canadian Bank Note pa nan opera e loteria y esey ta sosode cu hopi exito.
Ex-Minister di Deporte, Dangui Oduber, a purba tur forma pa trece cambio y eventualmente habri e mercado pa mas loteria pero no a logra. Cu cambio di Minister di Deporte, awor Endy Croes, ex-director di e fundacion, ta purba haci cambio cu speransa cu e si lo logra.
Presidente di Fundacion Lotto pa Deporte awor ta ing. Robert Maduro, ex-parlamentario di MEP y cu ta trahando na DIP. Separa di ta presidente di FLPD, e ta den mas hunta di supervision tambe pa gobierno. Por lo pronto e mes ta presidente y alabes director tanten cu no nombra un otro persona pa ta “belast met de leiding”.
