Tabata alrededor di 3:00 am ora cu polis a presenta cu urgencia den Bernhardstraat na San Nicolas p’un accidente cu brommer envolvi. Ta trata di un brommer color shinishi marca Yamaha modelo R1. E motociclista tabata biniendo for di pariba direccion pabou.
No ta conoci e motibo exacto dicon el a perde control, dal contra acera pa djey cay y lastra un poco riba asfalt. Ta su so cu su so, no tabatin otro motorcycle of auto envolvi.
No por bisa si e tabata biniendo mucho duro of si ta un cacho a sali su dilanti of no. E brommer a keda completamente destrui, practicamente no ta sirbi mas, el a kibra den dos pida. E taira y un pida body, e motor memey benta y e taira di dilanti tira mas pabou.
Bisiñanan a conta cu; a scucha un zonido duro parti pafo di cas, ora a sali a topa cu un hoben benta cant’i caminda ta sclama di dolor. E motociclista a ricibi basta sla na su curpa, a baha un band’i pia completo cu herida basta profundo y tur cos ta mustra cu a fractura su rudia tambe.
Riba caminda a keda varios piesa di e brommer benta, entre otro; shield y mas. Polis a bari esakinan for di caminda mientras ambulance tabata atende cu e victima, cu na final a transport’e pa hospital p’e ricibi atencion medico avansa. E motorcycle no tabatin un seguro valido, pues amigonan di e motociclista mes a percura pa un takelwagen bin busc’e brommer parti den dos pida for di Bernhardstraat, un poco mas pariba di ex-Hong Kong Supermarket.
