Brickelll Bay Beach Club Aruba ta un hotel cu mayoria di nos conoce y cu ta existi pa basta aña caba na Palm Beach. Ta un hotel di mas of menos 98 camber. Relativamente chikito, compara cu e otro hotelnan situa riba Palm Beach, pero e tin su clientenan.
Awo e hotel aki lo bay conoce un asina yama ‘rebranding’. Miho bisa, cu e lo tin un marca nobo, un liña di hotel nobo cu lo introduci su mes na Aruba, yama Radisson RED. Esaki ta un liña di hotel basta hoben. Funda na aña 2015 y cu actualmente tin hotel di e brand aki na Merca, Brazil, Sur Africa, Inglatera y desde otro aña na Aruba tambe!
E hotel ta un motel cu ta dirigi su mes riba un demografico un poco mas hoben, manera cu nan mes ta yam’e ‘Ageless Millenial Mindset’. E hotel ta incorpora hopi arte, musica, moda y cuminda.
E ta enfoca hopi riba su espacionan habri manera su bar, su lobby, su digital customer service y e colonan vibrante. Ademas di e hotel mes, su areanan habri manera entre otro su pool, ta bay hunga un rol hopi importante, unda cu por haya evento manera estilo di Vegas Pool Parties.
E trabounan apenas ta bay cuminsa. No ta un proceso cu lo cana den algun siman, sino algun luna. Ta spera cu pa otro aña lo haci e cambio di nomber, ora cu tur trabou di renobacion y adaptacion ta completa. Lo bay haci e trabounan aki cu e hotel operacional, pues ta opta pa hacie den fase.
Pa un relato mas amplio, lesa esaki den bo edicion di Trempan.
