Recientemente un biaha mas nos a wordo inunda pa un “kakefonie” cu nos a bin ta tende e ultimo añanan tocante di e dump. Recientemente nos por a tuma nota di un notificacion di parti di Ministerio Publico (OM na Hulandes) cu nan tambe a cay den un tipo di mal informa e pueblo, unda “tussen de regels door” ta ser bisa cu nunca tabata tin atencion pa e problema na Parkietenbos y cu ta yuda den haci propaganda pa e gobierno actual, cu otro palabra ta mete su mes den politica! Ta di lamenta cu un instituto cu mester ta imparcial ta haci su mes culpabel na tipo di cosnan asina.
Djis pa refresca memoria di esunnan na Ministerio Publico, for di prome di mei 2002 a PAGA candela y nos a bin cu e prome fase pa un solucion duradero, sostenibel, structural y pagabel, den forma di un “Sanitary Landfill”! Na e OM mester por tin hende cu sa esey toch? Como parti di e solucion ey, nos a cera e dumpnan na Vader Piet y na Jaburibari na un manera drechi y riba conseho di e mesun hendenan cu awe ta sinta banda di e minister! T’e hasta awe tin un parke recreativo na Jaburibari (Parke Curason). Of nos kier lubida esaki?
E maneho no a keda na ehecucion di fase Uno(1) so. A inclui ehecucion di fase dos (2) cu ta encera e dump na Parkietenbos. Den fase 2, despues di un procedura totalmente transparente (esaki confirma pa 7 uitspraken di Corte) a nifica un solucion duradero, sostenibel, structural y pagabel. Esaki por medio di e wasteaway plant di Bouldin & Lawson! E dump na Parkietenbos lo a wordo converti tambe den un Parke Recreativo mescos cu na Jaburibari.
Sinembargo un boycott feroz y sin misericordia a tuma luga. Esaki a wordo confirma den un veredicto na februari 2016 di Corte. Den e veredicto aki un biaha mas a wordo CONFIRMA cu e BOYCOT feroz aki, ta e causante cu te dia di awe e pueblo di Parkietenbos ta sufriendo. Pa colmo e boycott aki a continua te cu awe tambe.
Bin bisa awor den un declaracion oficial di OM cu niun gobierno a haci algo ta simplemente un manipulacion y un mentira! Y e cherry riba e bolo OM ta bisa cu no ta persigui niun hende, pasobra e minister concerni a bisa cu e lo bin cu un solucion. Si esaki no ta mete den politica, anto mi no sa mas!
“Een Openbaar Ministerie onwaardig”!
Den un reunion recientemente di parlamento un biaha mas nos por a tuma nota con e parlamentarionan ta mustra dede riba otro sin cu realmente bisa kico realmente ta e problema. Remarcabel atrobe ta pa constata con nos directornan di departamento, en bes di para pa lo corecto, un biaha mas ta hiba un maneho di “zoals de wind waait, waait mijn jasje”!
E director di DOW “doodleuk” ta bira un biaha mas “mucha manda” di un minister.
* Dia cu Benny Sevinger a boicotia e proyecto di Bouldin &Lawson, el a scoge pa bira cara.
*Dia cu a (mal) uza e placa poni pa drecha e RWZI-nan un biaha mas a scoge pa bira cara.
* Dia cu Otmar Oduber a uza e “restfonds” di FDA pa cumpra e porkeria di incinerator chikito, aki no solamente a bira cara pero a colabora activamente den e “gesjoemel” den e compra di e porkeria ey.
Por cierto (by the way) ni un dia e incinerator chikito a cumpli cu e “bestek”, pasobra ni un biaha e porkeria ey a kima ni cadavernan ni “medical waste ” manera poni den e “bestek” cu DOW mes a traha. Y awe tin e curashi di bisa cu e porkeria ey ta cumpli cu tur cos?
Mi no ta tecnico, pero mi kier reta e director aki pa mustra concretamente cu kimamento den un Airburner, kimamento di palo y e “sludge” ta malo pa nos medio ambiente! California (USA) ta e estado mas severo riba e tereno di medio ambiente, haci uzo di un “Airburner” y esaki ta cumpli cu e “EPA-standards”!
Si en berdad esaki ta malo, con bin a acepta pa e compania local a haci esaki pa mas di 10 aña y nunca DOW a bisa algo? Esaki djis pa complace cu Otmar Oduber?
Awor mesun modus operandi ta tumando luga. Pa e por laga su “jasje waai, zoals de wind waait” e ta bin gaña cu e incinerator chikito ta traha bon. Tanto E como e minister ta gaña! Esaki ta integro? Despues di a tuma nota di e tantisimo declaracionnan cu por a ser scucha y lesa ultimo dianan, ta hopi cla cu keto bay kier pone man riba e cabes di Otmar Oduber. No ta keda mi ningun otro opcion pa un biaha mas manda un otro “rappelbrief” na OM pa puntra con a para cu e investigacion concreto entorno e compra corupto di e incinerator chikito cu obviamente e gobierno aki ta haciendo su maximo esfuerso pa pueblo lubida y pa esaki bay den e famoso “doofpot”!
Pero esey lo no sosode! Mi lo keda riba lomba di tanto OM y como riba esun di e gobierno aki cu obviamente ta sostene e corupcion aki. Y si OM no mustra mi concretamente cu un investigacion real ta ser haci riba e denuncia di mi, mi lo acudi na Hof conforme articulo 15 di nos Wetboek van Strafvordering pa pone nan haci tal! Labamento di cabes di Otmar Oduber mester caba!
