Manera a keda anuncia, e siman aki ta programa pa Ministerio di Asuntonan Economico anuncia e prijs nobo pa productonan petrolero, cual ta inclui gasolin y diesel. E tema ta keda uno di gran preocupacion na nivel nacional ya cu ta afecta tur hende, di un manera of otro; sea directamente ora di yena tanki di gasolin pa mobilisa, of den e prijs di producto y servicio cu nos ta consumi. Mientrastanto, prijs ta conociendo cambio den tur otro isla di Caribe Hulandes tambe, pero cu e diferencia cu islanan BES (Bonaire, St. Eustatius, Saba) tin menos impacto danki na e reduccion aplica door di Hulanda. Na Corsou, por ehempel, siman pasa a prijs di combustibel y e tarifanan di awa y coriente a bay halto.
Prijs di gasolin ta consisti, entre otro, di e prijs pa bari riba mercado internacional, gastonan di almacenahe y transportacion. Manera cu e yega Aruba, ta calcula e accijns cu ta inclui BBO, BAVP y BAZV. Na esey ta añadi e margen di ganashi pa e distribuidor, e mayorista y e pomp di gasolin. E suma di tur e componentenan aki ta resulta den e prijs cu e consumidor, abo y ami, ta paga na pomp. Esey ta e cifra cu ta keda anuncia pa Departamento di Asuntonan Economico y cu lo drenta na vigor diaranson awo 13 di april.
Pa e relato completo cu comparacion di prijs den Caribe Hulandes, lesa e proximo edicion di TREMPAN.
