Lucas 6:45 ta bisa: “E bon hende for di e bon tesoro di su curason, ta saca loke ta bon y e mal hende for di e mal tesoro. Ta saca loke ta malo, pasobra for di abundancia di curason su boca ta papia.
Ta dificil pa hende make up of make over nan curason. Tin hopi hende cu hopi style di curason. Curason di comediante, curason politico, curason engañoso, curason orguyoso, curason arogante, curason perverso, curason malvado, curason cu no kier pordona, curason cu ta keda biba den pasado y tur e curasonnan ey ta demostra ken e persona ta realmente.
P’esey Dios cu ta Todopoderoso ta wak curason y no cara, pasobra cara por cambia, pero curason si no por ta makiya.
Eclesiastes 7:9 ta bisa: “No sea lihe den bo curason pa rabia, pasobra rabia ta biba den pecho di hende bobo.”
Proverbionan 16:23 ta bisa: “Curason di un hende sabi ta guia su boca y su lipnan ta papia cu conocemento.”
Pa motibo di curason duro, tin hopi hoben ta pasando den scual di bida. Nan ta riba mal caminda of no a caba scol, sin respet of adicto, violento, pasobra nan mayornan a tuma decision cu dureza di curason contra otro sin wak cu ta perhudica futuro di e muchanan.
Den e bida aki hopi hende kier ta uza pa Dios. Pero mientras cu no tin obediencia y rectitud di curason esey lo no sosode, pasobra esey t’e cosnan cu ta hiba nos na santidad y ta cosnan cu Dios ta aprecia den nos bida. Pasobra esey ta boluntad di Dios (Echonan 8:18+19+20+21).
Proverbionan 17:13 ta bisa: “Esun cu paga bon cu malo, maldad lo no bay for di su cas nunca.
Hopi hende ta keha cu cos ta dificil pa nan y nan ta purba move shelo y tera. Pero cos no ta cambia, pasobra ta pa falta di gratitud den nan bida, nan a lubida for di unda nan a sali, lubidando e Dios cu a saca nan for di scuridad pa luz y cu su misericordia, a duna nan un man, pasobra e curason a bira orguyoso, golos, arogante y asina e contacto cu Dios a kibra.
Proverbionan 20:6 ta bisa: “Hopi hende ta proclama nan mes lealtad, pero ken por haya un hende confiabel?”
Un hende no tin cu bisa ni pretende cu e ta integro, pero su curason y su actitud ta papia pa su mes, manera e palabra di Dios ta bisa na nan frutanan bo ta conoce nan. (Bateo 7:16-23).
Como mayor ta nos curason y nos actitud ta ehempel y guia pa nos yiunan, pasobra fo’i nos curason ta sali bon conseho of iresponsabilidad y nos boca tin di papia berdad.
Ora un hende ta pretende di tin dos curason (infieldad) un di nan ta falso y falsedad ta ruman di destruccion. P’esey tin asina tanto famia kibra.
Filipinonan 4:13 ta bisa: “Tur cos mi por den Cristo kende ta duna mi fortalesa. Esey ta nifica bendicion pa tur esunnan cu ta compronde Juan 15:5, pasobra asina ey e versiculo ta bira realidad den nos bida. Mi por haci tur cos den Cristo ora mi ta pega na Cristo.”
Pakico un hende tin di gaña otro hende, si e sa masha bon cu su mentira lo sali na cla pasobra Dios conoce cada intento di curason di hende?
Ban preserva nos famia cu un curason puro.
