A tira e première di Slovakia Robert Fico, kende a resulta gravemente herida. E incidente a tuma luga na Handlová, cu ta situa alrededor di 150 kilometer for di e ciudad di Bratislava. Directamente despues di e tiramento, a tuma luga e detencion di un sospechoso.
Segun un vocero di e gobierno di Slovakia, e prome mandatario su bida ta na peliger. A transport’e cu un helicopter pa e hospital na e ciudad di Banská Bystrica, cu ta situa den e parti central di e pais. Riba e pagina oficial di Facebook di e première, su vocero a informa cu “e siguiente oranan lo ta crucial pa e mandatario.”
Segun e canal di television di Slovakia “TA3”, despues di un encuentro cu su siguidonan, a tende cuater tiro y un bala a alcansa e première di 59 aña di edad na su barica. E corant di Slovakia “Pravda” a informa cu bala lo alcansa su pecho y barica, tin otro media ta menciona cu e tironan lo a alcansa tres biaha na un parti delicado di su curpa, su pecho y barica.
E tirado, segun media di Slovakia, ta un homber di 71 aña di edad, kende ta den posesion di un permiso di arma. Media na Slovakia tin un video unda posiblemente por a wak e persona responsabel na boei sinta riba un stoel. E ta bisa cu e no ta di acuerdo cu e gobierno actual.
