Diabierna atardi alrededor di 3:00 pm a sosode un situacion di peliger. Debi na falta di mantencion den combinacion cu e biento fuerte, dak di garashi di Arubus a bay halto y bay cay basta leu rib’e propio tereno di bus.
E dak a cay riba un bus staciona. Pa colmo, e bus cu e dak a cay riba dje ta para for di 2020, segun informacion. Ta trata di e bus 1905 cu a core cinco luna so y djey a par’e y plunder for di otro. Ta uz’e e bus pa piesa.
Danki Dios e dak no a cay riba ningun hende y herida nan. No obstante cu ningun persona a resulta herida, e chauffeurnan ta teme pa nan bida riba e tereno di Arubus. Ta di spera cu DTI, pasa y tira un control mirando cu falta di mantencion a hunga un rol grandi den e sucedido aki.
Esey so no ta e situacion, e chauffeurnan ta conta cu nan ta trahando den un situacion caotico. Busnan no tin airco, nan ta keinta, brake ta faya y mucho mas. Mientrastanto a acerca e director pa un reaccion riba e caso aki, pero el a nenga di comenta of duna cualkier declaracion.
A acerca sindicato SEPPA tambe y pronto lo comenta riba e situacion y e preocupacion di su miembronan. Y por ultimo, tambe a acerca e Minister encarga cu Arubus, Ursell Arends. Te ainda, no a ricibi ningun reaccion di e mandatario. Segun e secretaria di e minister, su hefe ta ocupa cu un reunion “pisa” awo diabierna atardi pa cual no por duna entrevista.
