Dialuna prome cu merdia autoridadnan meteorologico di Boneiro a emiti un otro relato relaciona cu e tempo cu ta sinti den e area Caribense relaciona cu horcan Beryl. Aunke cu e fenomeno aki ta yegando Sint Vincent, e islanan Hulandes ABC ta sintiendo e efecto di su presencia.
Boneiro su autoridad meteorologico a emiti un informe ta duna algun dato clave. Nan ta bisa cu no tin cambio significante den e pronostico relaciona cu e boletin di ciclon tropical. Ta keda si valido e advertencia pa e horcan Beryl.
Nan ta bisa cu e horcan por pasa como horcan mayor di categoria 4 260km (162 mi) nort-nortoost di Boneiro riba diamars mainta (07:00 AST). E riesgo di biento cu forsa di tormenta tropical na Boneiro ta keda hopi chikito (menos cu 10%). Tin un riesgo di biento cu temporalmente ta bini di zuidwest riba diamars.
Lama por bira bruto entrante diamars mainta. Olanan por bira di direccion nortwest riba diaranson. Ta calcula cu e cantidad di yobida ta keda bou di 25 mm (1 inch), riesgo di mal tempo.
Efecto riba condicionnan local
Biento:
E riesgo di biento cu forsa di tormenta tropical na Boneiro ta hopi chikito (menos cu 10%). Tin riesgo di biento di zuidwest durante diamars mainta y atardi.
Lama:
Lama ta bira bruto, olanan por subi te cu 8-10 pia entrante diamars mainta, principalmente door di olanan for di direccion nortoost. Altura di olanan lo baha gradualmente te 5-7 pia riba diaranson. Riba diaranson e olanan lo baha gradualmente te 2-3 pia, pero por bini di direccion nortwest.
Awasero:
Mayoria awasero y mal tempo relaciona cu horcan Beryl lo keda segun perspectiva na parti nort di Boneiro, pero algun por yega Boneiro entrante awe nochi caba. Probablemente e yobida lo keda bou di 25 mm (1 inch). Tin un riesgo pa mal tempo si.
Ta conseha autoridadnan local y habitante di Boneiro pa sigui monitoreá futuro progreso di e sistema di tempo aki y pa tuma tur precaucion necesario pa salbaguardiá bida y propiedad.
ARUBA
Meteo di Aruba no a emiti un boletin di e tempo pa prensa. Tabata normal cu tur dia e relato aki ta drenta dos bes pa dia. Pero riba e email di 24ora.com esaki a stop di drenta. Di loke por a lesa riba e website di e departamento aki nan ta bisa cu pa awe tardy nochi e tempo lo ta parcialmente nubla y seco. Mientras cu ta menciona cu marduga pa mañan den dia por spera poco awasero.
Situacion general di tempo pa proximo 24 ora: humedad persistente den region lo pone algun awasero desaroya localmente durante proximo 24 ora.
Condicionnan maritimo/ estado di lama: na partinan protegi di costa: keto, rond di 1 pia. Na partinan zuid: trankil te modera, entre 2 pa 3 pia. Na partinan oost te noordwest di costa: generalmente modera cu olanan alrededor di 4 pa 6 pia. Den curso di dialuna anochi lama lo cuminsa bira bruto debi na proximidad di horcan beryl.
Aviso/ alerta:
Un aviso pa no subi lama na partinan oost te noordwest lo ta na vigor pa botonan chikito dialuna atardi 6 pm te proximo aviso. Pa e partinan zuid ta pidi pa bay cu cautela ya cu resake modera por haci e partinan aki localmente poco bruto.
Potencial di awasero pa proximo 24 ora ta di 1 te 3 mm.
