Despues di seis aña, te awo caso Avestruz a yega na un culminacion. Ex-minister y miembro di fraccion di AVP, Benny Sevinger a gradici na prome instante na Dios p’e sentencia.
Despues di seis aña a yega un caminda, unda cu un hues a tuma e decision y cu ta duna e caminda tambe p’e dos cosnan cu e hues a conden’e riba dje, pa bay den Hoger Beroep y sali liber completo di esaki.
Despues di a scucha su sentencia den corte di prome instancia, Benny Sevinger a comenta cu e ta mustra cu ta un persecucion politico, cu esaki ta e forma con ta trata na Aruba. E ta mustra con un partido a uza Ministerio Publico. E hues mes a bisa cu tur prensa y e fanfaria cu tabatin durante tur e añanan aki, yamando Benny Sevinger pa corupto y cu tin cas na Miami, cas na Aruba, condominio, miyones na China y Panama y tur caminda, ningun di e cosnan ey por a proba y ningun di e cosnan ey ta den e sentencia tampoco.
Ta puramente politica, segun Sevinger. A sentenci’e riba dos cos, cual ta un sponsor cu su fundacion a haya pa su campaña politico hopi tempo atras. Hues a bisa cu e tabata supone di sa esey. Pa cuminsa Sevinger mes no tabata sa di e sponsornan ey. Pero en todo caso e fundacion a haya e sponsornan ey y e hues a bisa cu ta haya un castigo p’esey. Esey ta nifica cu tur politico en realidad mester haya castigo, pasobra nan tur ta haya sponsor. Probablemente esey lo keda tambe. Sevinger a lanta un stichting pa esunnan cu ta haci donacion pa despues por declara esaki. Ora cu kier haci cos transparente, ta uz’e contra di e politico mes. T’e mensahe cu hues a manda tur politico, pa cera nan stichting. Pa ora tin campaña wak con ta haya e sponsorship cash, sino ta sentencia riba esey. Tur e fanfaria di Benny Sevinger ta den conclave cu ken y a duna hende tereno y a bende miyones, hues a refuta tur esaki. Ministerio Publico no por a prueba cu Benny Sevinger no ta meti den e cosnan ey.
