Compara cu januari 2021, e cantidad di placa den circulacion a crece cu Afl. 42,2 miyon te na Afl. 4.818,6 miyon den e luna di februari 2021. Esaki a resulta for di un subida den tanto e reserva activo domestico netto (+Afl. 26,8 miyon) y den e reserva di divisa netto (+Afl. 15,3 miyon).
E expansion den e activo domestico a wordo causa pa un aumento den credito domestico (+Afl. 34,8 miyon). Transaccionnan no relata na credito a baha cu Afl. 8,0 miyon. E subida den credito domestico ta wordo atribui na un expansion den credito bancario netto na e sector publico (+Afl. 66,3 miyon) y un bahada den credito bancario na e sector priva (-Afl. 31,5 miyon). E subida den credito bancario netto na e sector publico a wordo causa pa un bahada den deposito di gobierno (-Afl. 106,2 miyon) y e asina yama “gross claims” (-Afl. 39,9 miyon).
E bahada den credito bancario na sector priva a resulta for di menos credito na empresa (-Afl. 23,7 miyon), credito na consumidor (-Afl. 9,7 miyon) y un subida den hipoteca pa vivienda (+Afl. 1,9 miyon). E reserva di divisa di e sector bancario a subi causa pa compra netto di divisa for di publico (+Afl. 140,2 miyon), principalmente relaciona cu entrada genera for di turismo y transferencia netto for di cuentanan den exterior di companianan local. Esaki a wordo pa un gran parti neutralisa pa benta netto di divisa na publico (-Afl. 124,9 miyon), mas tanto relaciona cu pago pa importacion di mercancía y otro servicionan.
Inflacion
E nivel general di prijs, cu ta wordo midi door di e indice di prijs di consumo, a registra un bahada di 1,9 porciento den e luna di februari 2021, compara cu februari 2020. E contribuyente principal na e bahada aki tabata e componentenan “Recreacion y Cultura”, “Mobilario” y “Transporte”. Pa loke ta trata e promedio anual di e tasa di inflacion, esaki a registra -2,2 porciento na februari 2021, compara cu -1.8 porciento na januari 2021.
Entrada di Gobierno
Entrada total di gobierno a suma Afl. 62,6 miyon na februari 2021, cual ta Afl. 41,4 miyon menos cu e mesun luna di e aña anterior. Esaki a resulta for di bahada den entrada di impuesto (-Afl. 40,5 miyon) y den entrada no relata na impuesto (-Afl. 0,9 miyon).
E caida den entrada di impuesto a wordo causa principalmente pa menos entrada for di impuesto riba entrada (-Afl. 7,7 miyon), e asina yama “transfer tax” (-Afl. 7,2 miyon), impuesto riba benta di negoshi (-Afl 6,1 miyon) y entrada for di impuesto riba vehiculo di motor (-Afl. 5,9 miyon).
Turismo Na februari 101`, e cantidad di turista a registra 31.982 turista, cual ta 63.305 menos bishitante (-66,4 porciento) compara cu na februari 2020. E bahada akinan a wordo causa pa un reduccion den tur mercado. E mercado di Norte Americano, e mercado Latino Americano, y e mercado Europeo a baha cu 53.216 bishitante (-65,6 porciento), 4.150 bishitante (-76,4 porciento) y 5.018 bishitante (-71,7 porciento), respectivamente.
