Durante e reunion di 1 di april 2021 y despues di a revisa dato economico y monetario mas recien, e Comite di Maneho Monetario (CMM)[1] di Banco Central di Aruba (BCA) a dicidi pa mantene e porcentahe actual di e tasa di e “reserve requirement” (reserva rekeri) na 7,0 porciento. E tasa di e reserva rekeri ta e cantidad minimo di reserva cu banconan comercial mester mantene na BCA y ta igual na 7,0 porciento di nan obligacionnan cu ta vence den menos di 2 aña. A considera e siguiente informacion y analisis pa yega na e decision aki.
Reservanan internacional
E reservanan internacional (incluyendo e diferencia di revaluacion di oro y reserva di divisa) a aumenta cu Afl. 24,3 miyon te cu y incluyendo 19 di maart 2021, compara cu fin di december 2020. E aumento aki ta debi na fiansa di gobierno ricibi for di exterior, entradanan relata na turismo y otro fiansanan di exterior ricibi pa sector priva. Reservanan oficial di divisa a nota un caida di Afl. 39,3 miyon. Consecuentemente, e reservanan oficial y e reservanan internacional a yega te na, respectivamente, Afl. 2.163,9 miyon y Afl. 2.377,6 miyon riba 19 di maart 2021. Di e manera aki e reservanan a keda na un nivel adecua ora di compara nan cu e nivel critico di 3 luna di pago registra ariba cuenta coriente y e metrico di ARA[2] di IMF (Grafico 1).
[1] E CMM a ser institui na mei 2010 pa periodicamente evalua y determina e maneho monetario di BCA. Adicionalmente, CMM ta aspira pa mehora e transparencia di maneho monetario.
[2]E metrico di IMF ARA ta referi na “Assessing Reserve Adequacy Metric” di Fondo Monetario Internacional cual ta midi con adecua e reservanan oficial ta door di compara esaki cu un averahe a base di peso di placa den circulacion, fiansa entre companianan liga na otro, debe riba termino cortico y termino largo, y exportacion di bienes y servicio.
Desaroyonan den credito
Den februari 2021, credito total a baha cu Afl. 12,7 miyon of 0,3 porciento compara cu fin di 2020. Esaki ta debi na e componentenan “fiansa na individuo” (-Afl. 12,6 miyon/-0,7 porciento) y “otro” (-Afl. 3,8 miyon/-0,7 porciento). E categoria “fiansa na individuo” a cay pa motibo di un demanda mas abou pa credito na consumidor. Mientrastanto, otro inversion y e asina yama “accounts receivable and prepayments” teni na banconan comercial, a impacta negativamente e categoria “otro”. Di otro banda, “fiansa na emprasa” a nota un crecemento di 0,2 porciento, causa pa credito ariba cuentanan coriente.
Inflacion
Inflacion, basa riba Indice di Prijs di Consumo (CPI), tabata 1,9 porciento mas abou na februari 2021 compara cu e mesun luna di e aña anterior (Grafico 2). Esaki tabata primordialmente causa pa prijsnan mas abou den e categorianan “recreacion y cultura”, “operacion di vivienda”, y “transporte”. E promedio di inflacion di 12 luna a baha te na -2,2 porciento na februari 2021. E promedio di inflacion di 12 luna, excluyendo e componentenan di energia y cuminda, tabata -0,7 porciento na februari 2021.
Likides prudencial
E likides prudencial di e banconan comercial (34,5 porciento), cual ta midi e cantidad di activo likido compara cu e activo total netto di e banconan comercial, a keda na un nivel comfortabel den februari 2021, compara cu e likides minimo rekeri di 15,0 porciento.
