El a traha 33 aña den e departamento di administracion di NV Elmar. El a baha cu pensioen na aña 2000 como “Administrateur” di nos compania nacional di distribucion di coriente. Ayera merdia el a fayece na su cas, banda di su casa y yiunan. Mario “Mai” Figaroa tabatin 82 aña di edad.
Mas cu djis un homber financiero, Mai tabata un tata ehemplar cu a percura di a laga dos yiu bon lanta y bon studia atras. El a dedica practicamente henter su bida como boluntario y fanatico fiel di e ekipo di futbol Deportivo Nacional di Noord. El a fungi pa decadanan den directiva di e club como tesorero.
Algo mas cu dos aña pasa a diagnostic’e cu cancer. El a start un proceso di tratamento na Aruba y a hasta bay Colombia pa busca un di dos opinion y evalua tratamento alternativa. Aunke cu e trayecto largo di tratamento y recuperacion tabatin varios momento cu tabata parce comosifuera cu e tabata curando satisfactoriamente, toch ultimo tempo a nota un deterioro. Ultimo dianan a not’e mas fragil y ayera a fayece na cas mes, den tur trankilidad cu el a custuma cu ne.
Minister Dangui Oduber, siendo un “much’i bario” y amigo di cas siendo bisiña di Mai a skirbi riba pagina di Facebook: “Awe nos bario Ponton ta di luto. E bario unda mi a lanta cu Mario (Mai) Figaroa como nos bisiña. Di mucha nos conoce Mai como un hende serio pero na mes momento hopi alegre. Un shon di hende cu a stima su famia, stima su team Nacional y homber balente y trahado. Condolencia y hopi forsa na Mildred, Melissa, Marc y henter famia. Cu Mai sosega na paz y cu Dios por dune sosiego eterno”.
