Luna di juli ta den porta y cu esaki tambe, e expectativanan pa Zomercarnaval ta birando mas halto, ya cu e dia aki e comunidad Carnavalesco di Caribe y mundo henter ta topa otro den un celebracion di alegria y color.
Eleccion di e realesa: Ta mik rib’e corona
Kathy Maduro, vocero di e grupo a indica cu dia 6 di juli lo tin e ‘Royalty Election’ cual lo tuma luga den De Doelen na Rotterdam. E aña aki nan lo manda un King enbes di un Queen. Aña pasa nan a manda Sharicia Hasham cual a sa tambe di conkista e titulo maximo di Zomerkarnaval Queen. Pero e aña aki nan lo manda un King, den persona di Gillian Gil. E preparacion ta den man di Endy Croes, un persona conoci pa su habilidadnan excepcional pa su conocemento profundo di cultura Carnavalesco. E ta esun encarga cu Gillian su coaching y tambe ta diseña su trahe pa cu Zomerkarnaval.
Actualmente e grupo ta den e fase final di preparacion. Pa mas informacion por bay riba nan Facebook page of Instagram. E banda Fanatiq lo compaña nan un biaha mas e aña aki, pa deleita e participantenan cu nan musica. E banda Fanatiq ta priminti di trece energia contagioso den e parada. E aña aki nan lo tin Blacky como nan invitado special pa duna un toke special n’e ambiente vibrante di Carnaval.
Tema di nan trahe e aña aki ta di Pilots of the Caribbean
Contrario na Aruba, tur preparacion ta pa un dia. Carnaval lo ta dia 27 di juli proximo y for di mei caba nan a cuminsa cu nan ‘maaskamp’ na nan sede na Rotterdam. Manera bisa anteriormente, nan tema di e aña aki lo ta “Pilots of the Caribbean.”
Un representacion mas imaginativo y colorido. E trahenan lo presenta un pallet di neon geel, neon roos , Tiffany blue y plata. E ta priminti di deslumbra e espectadornan.
Pa loke ta participante, e aña aki nan lo bay cu algo mas di 40 participante, cu ta lo minimo cu Stichting Zomercarnaval ta puntra p’e y e cantidad di participante no mag di pasa 200 participante. Pa futuro, nan lo ta spera di por yega al menos 100 participante ya cu nan no kier bay c’un grupo demasiado grandi.
E mision di Bacchanal Tribe ta bay mas leu cu e festividadnan di Zomercarnaval. Maduro a indica cu nan no t’ey solamente durante e Zomercarnaval, pero durante aña tambe nan ta purba organisa eventonan cu ta reuni e comunidad Caribense di Hulanda, fomentando un sentimento di unidad y orguyo cultural. Pa medio di e eventonan aki, nan ta pretende di recrea e ambiente anima y acogedor di Aruba, proveyendo un espacio pa e studiantenan y e recien yega conecta y celebra nan herencia. Mayoria di nan participantenan ta studiante- of starternan.
