Awe mainta hues-comisario mr. Jane Jansen lo trata e peticion di fiscal di Ministerio Publico, pa cera e politico Benny Sevinger pa 60 dia mas. Husticia kier wanta e parlamentario cera te dia cu su caso bin padilanti. Nan no ta sinti cu e caso ta cla ainda pa por laga e parlamentario den libertad, pa cual ta pidi pa want’e cera den prizon por lo pronto. Ministerio Publico a hasta comete un eror siman pasa ora cu nan a manda un comunicado di prensa anunciando cu hues-comisario a prolonga e detencion caba siendo cu ta e siman aki e caso lo tuma luga.
Pa motibo di reglanan estricto rond di pandemia y pa evita cu mester move rond cu e parlamentario, a opta pa haci e caso di awe mainta den forma virtual. Como tal, e fiscal lo ta for di su oficina na Ministerio Publico situa den Rumbastraat, e hues-comisario den su oficina na Corte den John. G. Emanstraat, abogado mr. David Kock lo ta for di su cas y e sospechoso Benny Sevinger lo ta for di KIA na Santo di Patia. Via un sistema di zoom lo uni e cuater pantayanan hunto y asina hues-comisario lo scucha e peticion di fiscal.
Contrario na e otro proceduranan, den cual e abogado of sospechoso no tin mucho di bisa, e biaha aki lo tin un momento cortico pa toch expresa su mes. No lo tin un caso formal, den cual lo por presenta argumentonan of defende e sospechoso, pero si lo por expresa na e Magistrado e motibonan dicon no ta di acuerdo cu e peticion di Ministerio Publico. Pues Benny Sevinger y su abogado David Kock lo por hiba palabra awe mainta durante e zoom-call cu hues-comisario y fiscal.
Carera politico di Benny Sevinger den man di Jane Jansen
Faltando apenas 6 dia prome cu eleccion, e hues-comisario lo mester evalua e caso bon, verifica e pruebanan riba mesa y e necesidad pa mantene e sospechoso cera. Ta un decision cu hues-comisario ta tuma tur dia pa varios caso, pero esun di awe ta un “high profile case” y den cual e lo determina futuro di un politico prominente den comunidad. Den caso cu Benny Sevinger sali liber awe, e chens ta grandi cu e lo crece politicamente y haya mas voto cu e lo a haya normal caba. Den caso cu prolonga su detencion, sin duda e lo tin un efecto riba su votonan y riba partido AVP completo den eleccion di dia 25 di juni 2021. Bisando esaki, e decision di hues-comisario awe lo ta uno historico y determinante pa cu resultado di eleccion di e aña aki. Pa mas informacion, lesa TREMPAN di awe.
