E dos lider politico mas grandi di pais Aruba ta na Hulanda p’asina atende diferente reunion importante na bienestar di pais Aruba. Prome minister, mr. Evelyn Wever-Croes tin casi un siman caba na Hulanda, mientras cu algun dia pasa, ex-prome minister di pais Aruba, mr. Mike Eman tambe a biaha pa Hulanda.
Ambos a bay cu diferente meta. Wever-Croes a bay pa purba negocia e ley di LAft, caminda a trata e tema den conseho di minister di Reino algun dia pasa, pero el a sali man bashi for di e reunion. Wever-Croes ta di opinion cu e ley ta anticua y nan a traha riba algun ahustacion, pero, pa trece cambio, ta necesario pa Conseho di Minister di Reino tambe vota na fabor. Esaki ta debi na e protocol cu Gabinete Mike Eman II a firma e tempo ey cu Hulanda. Wever-Croes a bishita diferente instancia caba, entre otro a sinta cu e miembronan di Eerste Kamer p’asina e splica su vision pa cu pais Aruba. Den e reunion ey, tin miembronan di e partido PVV cu a cuestion’e riba e asunto di loonsubsidie.
E prome minister a hay’e ta splica riba su trabounan y kico e ta haciendo p’asina e hendenan cu a cobra, paga e placa aki bek. Ta trata aki mas bien di e comision di Relacionnan di Reino di Eerste Kamer. Tambe e prome mandatario a bishita Secretario di Estado, drs. Alexandra van Huffelen, caminda a papia riba entre otro e ahustacion pa cu e LAft. Den mayoria di e reunionnan, tabata presente, Minister Plenipotenciario, mr. Ady Thijsen. Ta haya masha straño dicon a warda pa te ora prome minister biaha pa Hulanda pa por sinta cu e instancianan aki mirando cu pueblo ta paga un minister na Hulanda p’asina e representa nos den tur forma. Pero, sea, Wever-Croes no ta confia Thijsen pa vocifera su vision- y plannan di Aruba cerca e Hulandesnan Europeo of e no ta kere den su capacidad ta splica nan di e forma cu e kier.
Mike Eman apenas tin algun ora na Hulanda, ya el a bishita Minister di Estado Piet Hein Donner na Vredepaleis. Eman ta sinti cu e contactonan cu e tin cu Hulanda, hamas Wever-Croes por yega cerca nan. E ta kere firme cu e base di relacion estrecho cu el a crea durante su gobernacion, tabata uno solido. Pero cu binimento di un gobierno nobo y otro ideologia, pocopoco esey a bay perdi y ta mira cu ta bringa so e gobierno actual ta bringa cu Hulanda.
E lider di partido berde ta mira cu pronto lo tin un cambio di gobernacion, pa cual el a cuminsa adelanta e trabounan y pa bisa Hulanda cu pronto, lo drecha e relacionnan den Reino un biaha mas. Eman for di masha dia ta papiando di un asina yama, Sociaal Cultureel Planbureau. E pobresa na Aruba ta demasiado grandi, placa di pensionado no ta yega, costo di bida ta haltisimo y gobierno no bin cu ningun incentiva pa alivia e pueblo di tur e medidanan cu nan a introduci. Di baina e pensionado por come y ainda mas e tin cu tene cuenta cu e mester paga pa remedi tambe.
Mike Eman ta sinti cu ta momento pa cuminsa trece e speransa di cambio y ta importante pa Hulanda ta na altura di su plannan. E Sociaal Cultureel Planbureau ta pa crea un speransa y reconexion economico y politico. E lider politico cu mas di seis mil voto riba su nomber ta sinti cu den pasado el a logra establece un bon relacion den Reino y e ta cla pa hacie atrobe. E ta inclui e generacion nobo den henter e proceso aki tambe, ta mira cu el a biaha cu Wendrick Cicilia kende ta un canditato y un consehero huridico di partido AVP. Mirando cu Den Haag ta e capital politico na Hulanda, no ta nada straño cu pa puro casualidad, Mike Eman y Evelyn Wever-Croes topa cu otro sea den gang di un organisacion of riba caya. Mas sigur, Wever-Croes lo bisa Eman: “Kico bo ta haci akibanda, t’ami ta gobernando” y no ta nada straño cu Eman lo contest’e: “M’a bin drecha e erornan cu bo comete”.
Tocante Mike Eman
Michiel Godfried “Mike” Eman ta naci na Aruba dia prome di september 1961 y a sirbi como e di tres Minister-President di nos pais entre aña 2009 pa 2017. Su carera politico a inicia na 2001. Mike Eman a caba su estudio como hurista na aña 1992 y despues na 1996 a caba su estudio como notario.
Eleccion 2001 – 3933 voto
Eleccion 2005 – 6188 voto
Eleccion 2009 – 8068 voto
Eleccion 2013 – 8222 voto
Eleccion 2017 – 7822 voto
Eleccion 2021 – 6668 voto
Mester menciona cu despues di eleccion 2017, Mike Eman a anuncia cu e lo retira for di politica. Cu tempo, y despues di a pasa un tempo no activo pa motibo di enfermedad di su señora, el a regresa den partido y a bay eleccion 2021. Mike Eman actualmente ta ocupa e funcion di parlamentario y ta lidera e fraccion berde den Parlamento di Aruba.
Tocante Evelyn Wever-Croes
Evelyna Christina “Evelyn” Wever-Croes, un hurista y fiscalista, naci dia 5 di december 1966, riba dia 17 di november 2017 a asumi e puesto di Minister Presidente di nos pais. El a bira e prome hende muhe pa encabesa gobernacion di pais Aruba, despues di Henny Eman, Nel Oduber y Mike Eman.
El a participa den eleccion pa prome bes pa Partido Movimiento Electoral di Pueblo (MEP) na aña 2009 riba number 3 di e lista y a logra 1621 voto. Na aña 2011 el a asumi liderazgo di e partido cu su mesun omo a funda na 1971 y a bira e prome lider femenino di e partido, despues di defunto Betico Croes y Nel Oduber.
Como lider den eleccion na aña 2013 el a logra 3396 voto individual, mientras den e ultimo eleccion na September 2017, aunke e partido a bay dilanti cu 2 asiento, toch e votonan individual no a aumenta tanto, pero tabata bon pa 3503 voto riba nomber di Evelyn Wever, cu ta representa un aumento di 3.15%. Den e ultimo eleccion, Evelyn Wever-Croes a kibra su mesun record di voto, ora el a redobla su votonan personal y a yega 7518 voto riba su nomber!
mr. Evelyn Wever-Croes a studia ley na Universidad di Antias na aña 1985. Despues el a sigui pa Leiden, Hulanda, unda el a studia ley fiscal (Belastingrecht) te cu aña 1989. El a traha como Inspector di Impuesto di Aruba entre 1989 y 2003, trahando bou Gobierno di AVP y MEP. Ora di nombra director nobo, a scoge un otro persona riba dje, cu consecuencia cu Wever-Croes a opta pa sigui su carera profesional como Abogado y alabes Fiscalista na e oficina di abogadonan Croes, Wever & Tchong desde aña 2003 pa 2010, ora cu el a dedica completamente na politica.
Evelyn Wever-Croes ta casa cu Kenneth Wever desde aña 1991 y ta mama di Claudine Wever, Christine Wever y Kevin Wever y ta wela di Trystan Wever.
