Lider di fraccion di AVP, Mike Eman a duna di conoce dialuna mainta cu e procedura cu ta sigui pa cu tratamento di presupuesto 2023 di Pais Aruba ta den violacion total di e constitucion di Aruba. Prome cu cualkier ley yega parlamento, mester di un conseho di Raad van Advies, e organo di conseho cu nos tin den un sistema funcional.
Gabinete Wever-Croes II a manda pa Raad van Advies un presupuesto basa riba ingreso di BTW. Ora cu el a bay bek pa gobierno, a kita e BTW y a pone un aumento di BBO, pero no a manda e presupuesto nobo aki pa Raad van Advies. Awe ta pidi parlamento aproba un presupuesto cu no tin un conseho di Raad van Advies.
Eman a cita e articulo cu ta bisa: Raad van Advies wordt gehoord over alle ontwerpen van landsverordening y a splica cu un presupuesto ta un ontwerp landsverordening. P’esey a notifica gobierno dos luna pasa tocante falta di conseho di Raad van Advies y conseho di CAFT.
Ta haciendo un farsa di henter e procedura y autoridad di parlamento pa yega na un decadencia incomparabel den historia estatal di Aruba, segun Eman. “E siman aki lo tin circo di esunnan cu ta sostene e gobierno aki ciegamente pa aproba ciegamente un presupuesto 2023 cu por cierto no ta cumpli cu exigencianan, ni tampoco cu loke gobierno mes a acorda cu Hulanda,” asina e politico a bisa.
