Miembro di fraccion di AVP den Parlamento, lider fraccion mr. Mike Eman y drs. Melvin Wyatt-Ras, a entrega na Presidente di Parlamento, mr. Edgar Vrolijk un proposicion pa amplia e ley di ayudo financiero pa hende cu un handicap, pa mucha bou di 16 aña tambe por bin na remarca pa ayudo aki. Aworaki e ley ta duna e posibilidad solamente na hende riba e edad di 16 aña. E miembronan di e fraccion di AVP Eman y Wyatt-Ras ta haya e esaki un fayo den e ley (Landsbesluit houdende algemene maatregelen ter uitvoering van artikelen 8 en 19 van de Landsverordening Maatschappelijke Zorg) cu mester ta coregi y p’esey ta haci e proposicion pa cambio di ley aki. Di e forma aki e famianan cu un of mas mucha bou di e edad di 16 aña cu un limitacion fisico of mental lo por bin na remarca pa ayudo.
Costo y condicionnan
Loke Eman y Wyatt-Ras ta haci ta introduci un articulo nobo (8-a) den e ley cu ta reconoce y regla formalmente e ayudo financiero (=bijstand) pa mayor cu un of mas yiu cu un handicap cu edad bou di 16 aña. Pa bin na remarca pa e ayudo financiero aki e mucha(nan) mester ta biba cu e mayornan y mester keda proba cu e mucha(nan) tin un handicap fisico of mental cu ta trece gastonan necesario cu ne.
E suma di e ayudo financiero segun e proposicion di Eman/Wyatt-Ras mester ta mescos cu e suma actual pa ayudo financiero pa hende cu handicap den articulo 8 di e ley. Esta Afl. 950,=. Loke ta determina e suma di e ayudo financiero aki ta cu mester tin gastonan necesario cu ta resulta for di e condicion special individual di e mucha cu e handicap. Segun e miembronan di AVP Eman y Wyatt-Ras, e mayor cu ta haci e peticion pa ayudo financiero no mester ta un hende cu ya ta haya ayudo financiero (=bijstand). Pa financia e proposicion aki, Eman y Wyatt-Ras ta bisa cu mester a uza e cifranan di e Censo di aña 2010 ya cu e cifranan di 2020 no ta disponibel ainda. Nan ta yega asina na un cantidad di mas o menos 400 mucha cu ta bin na remarca pa e ayudo financiero nobo aki. Eman y Wyatt-Ras ta propone pa financia e proposicion door di fiha prioridadnan nobo den gastonan di gobierno den e presupuesto 2022.
Derecho di Mucha
E miembronan di e fraccion di AVP, Eman y Wyatt-Ras, kier duna mas contenido concreto na e tratado di ‘Derecho di Mucha’ cu Aruba tambe ta parti di dje. E tratado di ‘Derecho di Mucha’ ta bisa cu e paisnan cu ta miembro di e tratado aki mester reconoce cu un mucha cu un handicap fisico of mental, mester por biba un bida di calidad den tur sentido bou condicionnan cu ta sigura e importancia di e bida di e mucha y cu ta facilita su participacion den comunidad. Eman y Wyatt-Ras ta bisa cu den esencia nan proposicion ta bay pa duna contenido na e responsabilidad di gobierno pa yuda muchanan cu un handicap por biba un bida di calidad den tur plenitud. Un mucha cu un handicap fisico of mental tin derecho riba ayudo extra of special y ta henter comunidad pa medio di gobierno mester percura pa esey.
T’esey e proposicion aki ta haci segun Eman y Wyatt-Ras. cu e proposicion aki AVP ta sigui construi un sistema di ayudo den forma legal, cu ta accesibel pa tur hende. En special pa esunnan mas vulnerabel den nos comunidad. E iniciativa aki ta sali di e vision di AVP pa crea un comunidad mas husto, uno den cua nos ta cuida otro y crea mas oportunidadnan y condicionnan nobo pa tur ciudadano por biba un miho calidad di bida.
Loading…
Reload document
Open in new tab 
