Miembro di fraccion di AVP, parlamentario mr. drs. Arthur Dowers, a manifesta su preocupacion pa husticia na Aruba, señalando indicacion di interferencia politico den proceso hudicial, Den un huicio reciente, a menciona e Prome Minister relaciona cu persecucion di varios alto funcionario, loke Dowers a cualifica como un echo extremadamente peligroso. Desde un principio di e gobierno actual, a presenta denuncia falso contra varios colega y oponente politico, costando pueblo miyones di florin cu por a uza pa servicio esencial manera reduccion di schoolgeld y e costonan di energia.
Dowers a compromete pa investiga e accionnan aki ora cu nan yega na poder, buscando clarifica kende a beneficia di e gasto di 320 miyon florin. E ta convenci cu un hende a enrikece riba custia di pueblo y su obhetivo ta sigura cu e responsabelnan confronta consecuencia legal, pa abuso di poder y malversacion di fondo publico.
Pa loke ta Parlamentario drs. Mervin Wyatt-Ras, el a critica e presupuesto supletorio, señalando cu Raad van Advies a cuestiona e veracidad di e datonan presenta p’e gobierno. El a destaca e impacto negativo di e inflacion riba nivel di bida (bestaansminimum) di e ciudadanonan, hopi di cual ta perdiendo nan cas y auto y ta lucha pa cubri e necesidadnan basico manera alimento y educacion. E falta di sosten adecua a hiba nan na un situacion insostenibel pa hopi ciudadano, specialmente p’esunnan cu incapacidad y esunnan cu ta ricibi bijstand.
Wyatt-Ras tambe a acusa e gobierno di actua cu fin electoral, ofreciendo aumento salarial y yudansa cu mester a implementa desde varios aña pasa. E cantidad ofreci actualmente no ta suficiente pa satisface e necesidadnan real di e poblacion, cu ta rekeri un aumento di18% pa mantene un nivel di bida adecua, pero solamente ta ricibi 11%.
E parlamentario a resalta e falta di inversion den hubentud, infrastructura y educacion, señalando cu e gobierno actual a acumula un debe significativo sin hustifica nan gastonan. Wyatt-Ras a critica ehecucion di maneho imponi p’e Landspakketten di Hulanda, afirmando cu Aruba a perde su autonomia y cu e decisionnan actual ta dicta pa Reino.
Resumiendo, Dowers y Wyatt-Ras ta demanda un mayor transparencia y responsabilidad den e maneho di gobierno, bogando pa un husticia berdadero y un economia cu ta responde n’e necesidadnan di e poblacion, criticando e practicanan actual y yamando pa un cambio significativo den e gobierno di Aruba.
