Partido AVP semper a demostra cu echo, cu e tin solucion pa atende cualkier situacion dificil cu e pais y su pueblo a confronta den pasado, segun lider di e partido Mike Eman, kende a mustra cu AVP tin un “track record” amplio na momento di atende asunto di interes pa pueblo di Aruba.
“No e cuestion di sinta y cuestiona y critica e maneho desastroso di un gobierno cu no ta gobernando pa pueblo, cu ta sigui castiga pueblo cu cantidad di medida caminda e situacion lo bira asina mas serio despues cu siman pasa Evelyn Wever-Croes a firma oficialmente pa ehecucion di Landenpakket.
Pero nos di partido AVP por mustra cu echonan concreto, loke nos a soluciona den pasado, caminda semper interes di ciudadano cu menos entrada, interes di trahadonan ta bin na prome luga y ta un track record hopi concreto y real.
Pueblo mester por tin un caminda cu e por midi maneho di un gobierno y cu AVP pueblo tin hopi pa midi e capacidad di nos partido pa atende cualkier problema di e pais y di henter pueblo, pa loke nos a yega di haci caba.
AVP a yega di demostra cu nos por sinta na mesa cu sindicato y comercio, pa crea un vision pa Aruba caminda nos tabata inverti p’e crecemento economico, e pais por a sali fo’i crisis.
P’esaki por scoge pa dos manera, caminda ora cu gobierno tin falta di placa, por scoge pa aumenta tur impuesto loke Evelyn Wever-Croes ta haciendo p’e por cera su presupuesto of por scoge pa crea un desaroyo positivo caminda como gobierno bo ta inverti y pais ta crece door cu e pais ta haya mas entrada, gobierno tambe ta haya mas entrada.
Esaki ta pone cu gobierno por duna un ‘reparatietoeslag,’ por duna un miho bijstand, caminda por drecha scol y bario, cos cu den ultimo cinco aña no a pasa.
AVP ta determina pa na momento cu nos comunidad castiga pa demasiado aña cu medida, uzando como excuus, cu gobierno anterior a faya, papiando di mega debe pero cu a resulta di no ta berdad y pueblo dicidi di castiga e gobierno aki, nos lo ta cla pa atende cu tur e situacionnan incorecto aki.
AVP lo hiba dialogo extenso cu e gremionan, yega na un vision concreto con e pais aki tin cu sigui dilanti y ora cu tin esaki forma cu sosten di e gremionan, bay Hulanda y sinta na mesa cu gobierno Hulandes pa coregi tur loke Evelyn Wever-Croes a faya den sirbi interes di pueblo di Aruba.
E preguntanan cu pueblo tin cu haci na su mes ta con por a cu si gobierno anterior a laga un situacion malo atras, Evelyn por a yega Cocolishi cu asina hopi famia, con por ta e situacion financiero tabata malo, diripiente gobierno a presenta un surplus riba presupuesto 2023?
Con por ta cu gobierno anterior a laga un situacion malo, gobierno awo ta cumprando auto di 140 mil of 200 mil florin p’e ministernan core aden?
Pa AVP ta masha importante pa bolbe sinta na mes cu e sindicatonan hunto cu comercio, lanta bay Hulanda, sinta cu Hulanda, haci un negociacion nobo y bisa Hulanda cu locual nos kier pa pais Aruba, ta un perspectiva cu Aruba por crece y cu nos pueblo tambe por crece.
Caminda nos tur por comparti den prosperidad di e pais y cu pueblo no por ta sufriendo manera t’e caso n’e momentonan aki y partido AVP ta cla pa esey, entre otro atende e cambio di ley caminda un empleado ta aumenta tempo di prueba di seis luna, haciendo posibel cu trahadonan por retira ora cu e dunado di trabou kier y caminda departamento di labor ta perde tur poder pa atende interes di e trahadonan.
Prome cos cu AVP lo haci ta forma un frente nacional na Aruba, cu sindicato y comercio, yega na un acuerdo di un vision nobo p’e pais aki, caminda pueblo por hala rosea responsabel, percurando pa Aruba crece y por paga tur su necesidadnan y nos lo bay Hulanda y convence Hulanda y nos ta convenci cu nos a yega di haci esaki den pasado y cu nos lo convence Hulanda cu mester tin un otro direccion cu e landenpakket desastroso aki cu pueblo ta sufriendo bou di esaki,” Parlamentario Mike Eman a declara.
