Na clausura di e Interparlamentaire Koninkrijksoverleg (IPKO), parlamentarionan di partido AVP cu a forma parti di e delegacion di Aruba a yega na e conclusion cu Prome Minister Evelyn Wever-Croes a djis firma unda cu nan a bis’e pa firma, sin a acorda nada cu ta en berdad di vital importancia pa e pueblo di Aruba.
Drs. Mervin Wyatt-Ras a indica cu ora cu a pensa cu Landspakket ta un reforma pa beneficia comunidad, pasobra esey Gabinete Wever-Croes a propaganda, e realidad ta cu topico manera pobresa, empleo y nos clima no ta forma parti di e convenio.
Mas aleu, den deliberacion cu diferente parlamentario di Aruba y di Corsou y St. Maarten, lamentablemente mester constata cu e gobiernonan no ta informando nan respectivo parlamentonan manera mester; ni sikiera e parlamentarionan di nan propio fraccionnan di coalicion.
“Nos ta bay haya reforma cu ta impone riba nos pueblo, cu ta trece medida cu ne y ta empobrece nos pueblo tanto riba tereno social, pero tambe salud publico,” asina e parlamentario a complementa bisando.
Wyatt-Ras: “Ta inhusto cu nos hendenan tin cu paga pa nan medicina y eynan bo ta wak cu gobierno no tin e sentimento pa nos pais, no ta papia cu nos y awor bo ta mira cu nos, como AVP, na momento cu nos a bisa cu e Landspakket aki no ta na bienestar di nos pais, nos tabatin rason.”
mr. dr. Ryçond Santos do Nascimento di su banda califica como un berguensa cu mester a bay IPKO pa realisa cu bo mesun gobierno a sconde e detayenan di e Landspakket y esaki no ta inclui e aspectonan di mas importante di nos comunidad.
Santos do Nascimento ta convenci cu e motibo ta cu e convenio firma cu Hulanda no ta traha a base di dialogo,ni di un democracia berdadero. Tabatin mester di un dialogo caminda comunidad ta fiha kico ta su deseo y su aspiracion; den ki direccion e kier bay.
“Tin un problema cu full e pensamento cu un par di hende por bay dicidi kico ta importante pa un pueblo. No ta asina democracia ta traha,” e parlamentario a expresa. “Democracia ta traha ora cu pueblo ta bisa unda su dolor ta y e dolor di e pueblo aki ta su cartera y su salud.
Di su banda, parlamentario Gerlien Croes a reitera cu AVP no tabata nunca contra reforma, sinembargo den e afsprakenlijst por a mira cu, por lo menos un tercer parti di e Landspakket, no ta funciona manera cu el a ser bendi door di e gobierno di Aruba. “Hasta Hulanda ta declara cu e parlamentonan di e paisnan aki mester tabatin hopi mas di bisa den e proceso y mester a consulta cu nan.”
