Minister di Economia mr. Geoffrey Wever tabata den parlamento pa un encuentro publico. Aki el a trece su maneho/vision pa economia mas duradero y diversifica.
mr. drs. Arthur Dowers, parlamentario (AVP), a splica cu di no a mira nada di diversificacion. Loke a presenta ta inclusion y duradero. Por mira copia di cierto proyecto cu tabata presenta den pasado. E mandatario tabata bay hopi riba e parti di green, pero ta maneho di AVP den pasado.
Sinembargo, e parlamentario ta conclui di ta sinta eynan pa seis aña den gobierno, nan no a tuma tur paso necesario pa kita e ‘red tape’ y haci posibel pa facilita e economia cu nan mes ta papiando di dje.
Loke Wever a presenta no ta un presentacion cu ta haci un desaroyo economico grandi. Loke el a presenta ta proyecto chikito, pero cu nan no ta bay haci diferencia grandi pa sobrevivencia economico di Aruba. Loke nan a presenta ta pone e posibilidad pa tin greenhouse cu solar panel. Segun Dowers, loke e mandatario a presenta no ta posibel, pa motibo di tur red tape existente. No ta posibel pa realisa un proyecto manera e gobierno ta presentando.
mr. Gerlien Croes, parlamentario (AVP), a splica cu a yama un reunion informativo, unda Minister di Economia a presenta su plan nobo, yama esaki ‘Un maneho inclusivo y sostenibel p’e economia di Aruba.’ E mandatario a bisa cu e plan presenta ta un analisis di varios documento existente den e ultimo añanan. Nan a purba di saca locual ta mas realistico y purba di identifica cu hopi stakeholder, cua ta e diestres proyectonan cu nan ta bay ehecuta pa locual ta desaroyo economico pa Aruba.
Ta di reconoce esunnan cu ta profesional cu ta sostene un minister ora haci tipo di investigacion aki. Croes a bisa loke mester cuestiona na final di dia ta kico ta realistico of no. Na momento cu ta bin bisa den Parlamento di Aruba cu ta bay enfoca riba number dos dje Nationale Plan van zonne energie (Plan Nacional di Energia Solar. Tambe a bisa cu tin hopi reto cu grid y a sinta cu Utilities, e parlamentario a expresa reto cu grid ta existente pa cinco of seis aña caba. Durante e encuentro, e mandatario a bisa cu agricultura ta number un dje lista di aanpak, pero e parlamentario ta cuestiona e echo cu tin grupo a manda rappel pa e minister concerni y no ta haya un contesta.
No por tin un minister cu ta bisa di ainda no sa si hydrogen ta bay tin un bijdrage werkelijk n’e crecemento economico di e pais aki. Pero, diaranson tabatin un Minister di Energia cu a bisa cu Aruba ta bin c’un Hydrogen Valley. Croes kier sa den cua Ministerraad e mandatario ta sinta, pasobra na cierto momento ta haya duele di Wever ora e tabata presente den parlamento.
