E seleccion di Aruba a topa Cayman Islands den cuadro di clasificacion di Mundial pa Qatar 2022 na Tampa Florida. Despues di un tempo Aruba a sa di gana un wega internacional. E wega entre Aruba y Cayman Islands a bay 90 minuut y 3 minuut adicional, pero Aruba a sa di sobresali y bay cu e victoria di 3-1.
Jonah Ebanks a habri e marcado y dies minuut despues Aruba a tabla wega cu gol di Joshua John. Prome cu mita a bay aden, Terence Groothusen a anota e di dos pa Aruba. Den di dos tempo Cayman Islands a purba yega area di gol di Aruba y no a logra anota. Aruba a bolbe haya oportunidad y di tres gol a cay pa medio di Joshua John un biaha mas na di 75 minuut. E wega a termina 3-1 pa Aruba.
E seleccion tabata uno completamente diferente den locual tabata e prome dos weganan. Esaki tabata debi na e medidanan cu tabata vigente na Merca durante e prome weganan. Aworaki Arubaanse Voetbal Bond (AVB) por trece hungado di Hulanda y cu ta hunga na Europa, asina ing. Richard Dijkhoff, presidente di AVB, a splica.
Por mira e diferencia den nan presentacion riba tereno. Presidente di AVB ta manda palabra di pabien na tur cu ta envolvi den futbol. E victoria aki a duna animo na e ekipo. Despues di e wega contra Cayman Islands, ta mustra cu Aruba tin potencial. E siguiente wega di seleccion di Aruba ta diasabra, 5 di juni pa 8:00 pm. Aki Aruba lo topa cu e seleccion Canades. E wega aki tambe ta na Merca, pero mester a tuma luga aki na Aruba.
Aruba no tin un stadion cu ta cumpli cu e exigencianan di FIFA, ta obliga di hunga e weganan den exterior. A pesar di esey, Aruba tin un seleccion cu animo hopi halto y specialmente loke a keda demostra den e wega. Naturalmente anima y curasha e hungadonan pa haci lo maximo. AVB sa cu ta bay topa Canada, un ekipo fuerte, pero nada no ta imposibel. Loke kier mira ta cu e hungadonan aki a duna tur locual nan tin den nan pa representa e dushi pais Aruba.
