Diasabra marduga, den careda di 1:00 am, polis y ambulance cu maximo urgencia a bay Kudawecha unda un auto lo mester a alcansa un peaton y lag’e herida.
Ta trata aki di un Hyundai Santa Fe colo blauw, numera A-24176, cu a dal un peaton cu e momento ey tabata crusando caya, na altura di New Ambiente Bar & Restaurant. E victima, un homber di edad avansa, a bin di un celebracion di e victoria di Colombia.
Mirando e gravedad di e situacion, e personal paramedico a opta pa transporta e victima pa hospital p’asina e haya tratamento medico avansa.
Mientrastanto polis di trafico tambe a presenta p’asina nan haci nan investigacion p’e causa di e accidente. A bin resulta cu e chauffeur di e Santa Fe tabata core auto bao influencia di alcohol, despues cu polis a pone supla. Por a tuma un kraak basta bon riba e windshield di e auto como resultado di e impacto.
Polis a detene chauffeur di e Santa Fe y hib’e warda unda cu e lo mester a duna cuenta na Fiscal Auxiliar di su actonan.
