Tormenta Tropical Beryl ta avansa p’e parti zuidoost di Caribe y ta premira cu e converti den un horcan mayor prome cu e yega Barbados diadomingo anochi. Un horcan mayor ta uno di horcan di categoria 3 of mas grandi, cu biento di por lo menos 178 km/h.
Tin alerta di horcan pa Barbados, Saint Lucia, Granada y Sint Vincent & The Grenadines y tin un tropical storm watch pa Martinique y Tobago.
“Ta asombroso pa mira un pronostico pa un horcan mayor den luna di juni den Atlantico y as den e zona asina den oost di e tropico,” e experto den Horcan, Michael Lowry, a comenta.
E centro di Beryl lo pasa mas of menos 45 kilometer zuid di Barbados, segun Sabu Best, director di servicio meteorologico di e isla. Diasabra, Beryl tabata mas of menos 1,320 kilometer oos-zuidoost di Barbados, cu biento maximo sosteni di 100 km/h y moviendo west riba 37 km/h. “Ta spera un fortalecemento rapido,” National Hurricane Center a informa.
E awanan calor ta impulsando Beryl, cu e contenido di calor di e ocean den Atlantico profundo na su nivel di mas halto registra p’e epoca di e aña aki, segu Brian McNoldy, investigado di meteorologia tropical di e Universidad di Miami. Beryl ta e tormenta tropical di juni mas fuerte registra den oost di Atlantico tropical, Philip Klotzbach, investigado di horcan di e Universidad Estatal di Colorado, a señala.
“Preparacion ta clave,” Prome Minister di Barbados, Mia Mottley, a bisa den un mensahe publico. Miles di persona ta na Barbados p’e final di Copa Mundial di Cricket, cu India y Sur Africa, hungando na Bridgetown. Algun fanatico, manera Shashank Musku, ta haciendo pura pa cambia nan vuelo pa sali prome cu e tormenta.
Di su parti, Prome Minister di Sint Vincent y the Grenadines, Ralph Gonsalves, a anuncia cu e shelternan lo habri diadomingo anochi y a pidi e poblacion pa prepara. El a ordo reabastece e vehiculonan dii gobierno y a pidi tienda y e stacionnan di gasolin pa amplia nan ora prome cu e tormenta.
Beryl por laga te cu 15 centimeter di awasero na Barbados y e islanan cercano, cu ola te cu 4 meter di haltura y labadera te cu 2 meter.
No lo tin impacto directo riba Aruba
Aunke Beryl no lo tin impacto directo riba Aruba, su cercania por provoca condicion climatico adverso. Biento fuerte por daña structura liviano y causa caida di mata, afectando e suministro di coriente y comunicacion.
Pa loke ta lama, cu ola halto, por genera erosion na costa y pone boto chikito na riesgo, como tambe e actividadnan recreativo na beach.
Nos a combersa cu Rino Hermans di CMO, kende a comenta cu pa dialuna, cu e mal tempo por ta mas cerca, por mira si e humedad den aire ta subi cu por causa yobida local.
Beryl t’e di dos tormenta nombra pa loke ta premira cu lo ta un temporada activo di horcan, cu ta core for di dia prome di juni te cu dia 30 di november. Ta spera cu e temporada 2024 tin entre 17 y 25 tormenta nombra, te cu 13 horcan y cuater horcan mayor, superando e averahe.
