Manera ta conoci, awe mainta a tuma un luga un accion di protesta na KIA. Aki ta caminda cu e sindicatonan cu ta representa e miembronan a vocifera diferente preocupacion. Tin un total di diesun punto di preocupacion cu e sindicatonan kier pa e minister encarga cu husticia atende cu ne mesora. E trahadonan di KIA ta pidi cabes di e director, sinembargo, debi na e menasa serio; a conseha e director, Gino Winklaar pa no presenta na KIA te cu proximo aviso.
Minister Rocco Tjon a vocifera cu; ta considera sindicato un partner importante den su maneho como minister. E trahadonan ta sinti cu e minister, esta Rocco Tjon no tin atencion pa KIA, mirando cu te ainda e no a bishita prison, di cual pa un tempo, e mes tabata director di KIA, nombra pe ex-Minister Arthur Dowers di AVP. Tjon a pone enfasis riba e hecho cu mas di sesenta departamento ta cay bou di su inisterio, pues ainda no a haya e oportunidad di bishita tur departamento debidamente.
No obstante esaki, e mandatario a aclarea u e ta maneha un “open door policy”. Pa e motibo aki, den e carta caminda e ta contesta sindicatonan, a splica tambe cu tur personal cu ta traha na KIA, cu a solicita un reunion cu su persona durante e cuater lunanan aki, a wordo atendi debidamente, di cual den tur transparencia, e tin e lista cu tur e nombernan documenta.Adicionalmente, a toca e parti di reorganisacion, di cual tambe a splica durante nan ultimo reunion di dia 18 di Januari, cu actualmente ta en espera di e rapport di e “bezwaaradviescommissie” pa por continua cu e evaluacion, cual ta parti di e procedura di un reorganisacion.
Si tur cos ta bon, segun indicacion di Departamento di Recurso Humano (DRH), pa comienso di maart e rapport lo keda cla, y lo bolbe reuni riba e topico aki.A toca e punto cu; e mandatario durante un conferencia di prensa a bisa cu e director di KIA lo ta na cas, sinembargo, esaki no ta cuadra cu e realidad. E organo independiente, cual ta ‘stelsel bewaken en beveiligen’ a indica cu e director na e momentonan aki no por ta na KIA. Cada menasa ta diferente y e informacion di e menasa ta dicidi e tipo di medida cu ta implementa. Pa e motibo aki ta observa continuamente, pues na momento cu ricibi conseho for di e organo aki, e director lo bolbe bek KIA.
E ultimo punto cu a menciona ta cu durante nan ultimo reunion, a expresa nan malcontento cu e funcionamento di e director, di cual Minster Tjon a indica na nan cu e lo hiba un combersacion cu e director y haci palabracionnan y lo mantene nan al caso di esaki. Por ultimo, Minister Tjon a expresa cu di su banda e ta wak bek na un bon cooperacion cu e sindicatonan y ta sigura cu esey ta e intencion di su minsterio mirando padilanti. Na mes momento, a Tjon a duna di conoce cu un bishita no ta defini e atencion cu ta brinda na e departamento, pa enfatisa riba e hecho cu a aloca 1.5 miyon florin adicional pa diferente proyectonan cu ta bay eleva siguridad pa e personal di KIA. Ta pendiente pa un proximo reunion entre Rocco Tjon y e partidonan concerni pa cu KIA, entre otro e sindicatonan.
