Diamars Gobierno di Aruba a anuncia un aumento di prijs di gasolin, entrante diaranson 13 di april. Un decision cu sigur no a cay den bon tera cerca e ciudadanonan.
Nos reporteronan di 24ora.com a bay haci un encuesta meymey di nos ciudadanonan pa asina haya sa un poco mas di loke nan ta pensa tocante e aumento di prijs di gasolin.
Ricardo Muller a indica cu e y su señora lo hayanan ta corta den algun gasto. Nan yiunan ta grandi y nan a bay for di cas caba, cual ta haci cu e cu señora lo ta mas facil pa corta den algun gasto sin cu e ta trece demasiado peso ariba nan presupuesto. Pero un caminda cu nan no por corta ta den cuminda.
Rhomyko Winklaar ta un ciudadano cu no ta sinti e efecto di e aumento di gasolin, mirando e hecho cu e tin un auto electrico. Pero e reto mas grandi di tin un auto electrico na Aruba, ta e infrastructura. No tin mucho caminda pa charge e auto, cual ta haci cu mester planea con y ki ora pa charge e auto, pa den dia no mester keda sin bateria.
Un di e ciudadanonan entrevista tabata Ricardo Muller, un ex-polis cu awendia ta gosando di su pension. E ta di opinion cu gobierno mester a haci algo toch, ya cu na Corsou nan a baha e accijns, pa yuda e pueblo un poco. Aki na Aruba tur cos ta subi, mester pensa riba e taxista- y e chauffeurnan di autobus.
Tabata tin algun turista tambe cu a expresa cu gasolin na Aruba ta hopi mas caro cu na Merca, cual ta pone un peso extra riba nan presupuesto. Esey a haci cu nan ta keda menos na Aruba. Normalmente nan ta keda dos pa tres siman, pero e biaha aki nan a keda un siman so.
Efi Tromp, taxista tabata di opinion, cu tur e ganashi di su trabou ta bay den gasolin. Nan no por bay verkort, ya cu si nan core menos, nan ta bay gana menos. E tabata tin palabranan menos netchi pa e gobierno actual, cu nan maneho ta laga hopi di desea. Pero no por haci nada, ya cu mester biba cu ne.
E preocupacion mas grandi cerca nos ciudadanonan ta cu tur cos ta subi, menos e salario. Prijs di gasolin lo baha un poco, subi dobbel. Mester cuminsa ta mas consciente di cuanto ta core y cuanto ta costa pa yena tanki y purba want’e mas tanto posibel. Carpooling ta un opcion of pone placa un banda, cuminsa traha riba un budget mensual, dedica solamente na gasolin.
Esunnan cu ta haci transporte escolar ta un di e gruponan cu tambe ta sinti e efectonan di e aumento den e prijs di gasolin, ya cu nan tambe ta core bay bin pa mucha na scol. Ta haci cu nan lo mester baha man na cierto gastonan, conoci den pueblo como ‘cremencha’.
Erick Donata cu ta traha como taxista tambe ta haya cu esaki ta un otro sla duro pa esunnan cu ta traha como taxista, cu ta cunsumi hopi gasolin, ya cu nan trabou ta di henter dia. Lo mester cuminsa baha den gasto, come menos y purba spaar unda cu por spaar.
