Aruba Trade & Industry Association (ATIA) a tuma nota cu e gobernantenan ta keda bisa algun declaracion cu nos tin cu aclaria di biaha, pasobra esakinan no ta berdad!
ATIA ta PRO un sistema di BTW
Den mas cu un ocasion sea ta den entrevista of den articulo ATIA vocifera cu e ta pro un sistema di BTW, y nos ta pro un sistema indirecto pa hopi aña caba. ATIA tin posicion cual ta documenta desde 2017 caba unda cu nos ta purba advoca pa un sistema indirecto. Un sistema di BTW pa Aruba mester ta uno simpel, cu un (1) tarifa cu un base amplio cu menos excepcion posibel. ATIA no tabata di acuerdo e sistema cu gobierno a presenta, pasobra e no tabata simpel, tabatin dos tarifa (6 y 18% cu a cambia despues pa 6 y 14%), e base no tabata amplio, y tabata tin tur excepcion mescos cu BBO. No unicamente e anterior, pero tambe e sistema lo ta uno cu lo tin su efectonan inflatorio pa nos economia, specialmente aña pasa ora inflacion mundialmente tabata halto.
Pa un solucion temporal, ATIA no ta contra BBO na frontera
ATIA a vocifera den pasado cu e ley di BBO na frontera ta uno aceptabel solamente pa un temporada transitorio te ora bin cu e ley di BTW. Y si kier hacie como un “hybrid: pa cuminsa custumbra pa introduccion di un sistema di BTW, pakico no haci e BBO na frontera mescos cu BTW, unda tur producto importa ta haya e derecho pa haya un “input credit” y no solamente pa handelsdgoederen. Manera nos por a lesa den e ley, gobierno a introduci “handelsgoederen” den ley den e manera mas limita posibel y no e definicion amplio. Manera nos a vocifera den nos ultimo conferencia di prensa, esaki lo bay tin consecuencia cu e prijsnan lo subi sigur!
ATIA a warda algun luna pa haya un reunion cu DIMP
Atrobe, esaki no ta completamente corecto. Si ta corecto cu ATIA tabata tin un reunion di tres ora cu Departamento di Impuesto (DIMP) ariba 29 di maart 2023. Nos a haya e reunion despues casi dos luna cu nos a purba haya contacto cu directora di DIMP pa reuni ariba e efectonan di e cambio di ley di BBO desde prome di januari 2023. Nos a haya e contacto cu minister y directora di DIMP despues cu nos a bay den media pa haci entrevista pa por haya nan atencion. Den e reunion aki, directora di DIMP na final, pues ultimo dies minuut, a mustra ATIA algun informacion di e cambionan den e ley cual primordialmente a para keto na e definicion di “Handelsgoederen” cu a cambia completamente despues di nos reunion pa un definicion menos amplio cu ta limita oportunidad cu compania por haya credito pa e BBO paga na frontera.
Conclusion
En conclusion, ki dia nos tur ta bay cuminsa papia cla? Nos tur ta biba riba e baranca aki, un no por sin e otro. Nos tur ta forma parti di economia di Aruba, y nos tur tin nos parti ta hunga den sociedad. Mester stop di punta dede y papia e berdad y papia cla. Na mesa ta yega na otro, no den media!
Awo unico cos cu ta keda ta cu nos lo keda cu speransa cu Parlamento lo haci nan huiswerk corectamente y no bay aproba un ley sin sinta cu stakeholders pa por haya un analisis di e efectonan cu realmente comercio y comunidad lo sinti. Nos mester keda stimula comercio pa asina engrandece nos economia, locual lo garantisa mas empleo, mas placa den caha di gobierno y un miho futuro pa tur ciudadano di nos dushi isla Aruba.
ATIA
Aruba Trade and Industry Association (ATIA) a wordo funda na aña 1945 y ta e organisacion principal cu ta representa e empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association
