Prome di september ta acercando y ainda no tin claridad riba e tema di e RAft (Rijkswet Aruba Financieel toezicht). Luna pasa Aruba Trade & Industry Association (ATIA) a emiti un comunicado splicando cu cada porciento extra cu Gobierno di Aruba mester paga bek na e fianza di sosten di COVID lo costa nuebe miyon florin. Si no firma e RAFt pa haya un porcentahe favorabel di 3.1% lo minimo cu e lo costa Pais Aruba anualmente ta aproximadamente trinta miyon florin pa aña extra na interes so pa e siguiente binti añanan!
Encuesta na ATIA su miembresia
ATIA a haci un encuesta den su miembresia pa por midi e sentimento bou di e comerciantenan si ta faborabel of no pa e RAft ta firma y acepta pa Gobierno. E resultado ta papia pa su mes. Un total di 92.6% a contesta cu lo no ta contra un RAft.
E pregunta primordial cu ATIA tin ta pakico acuerdo firma den un tempo cu hopi incertidumbre, pues den pandemia, awo no ta aceptabel mas? Lo ta bon pa Gobierno splica na comunidad henter pakico e RAft ta algo malo pa economia di pais Aruba. Gobierno di Aruba tin un plan con pa paga e interes extra cu no ta door di subi impuesto y asina haci bida na Aruba mas caro pa tur e ciudadanonan?
Di unda Gobierno lo saca fondo pa repaga?
E pregunta cardinal lo ta, di unda Gobierno di Aruba lo bay saca e fondonan extra pa por paga e interes (y fianza) nan aki anualmente, sin cu e tin cu bin cu mas medida pa pueblo y comercio. Den pasado a papia cu lo bay refinancia tur fianza di Aruba na un interes mas faborabel. E opcion ey no t’ey mas den mercado liber. Hulanda su porcentahe ta esun mas abou, paso hasta e bononan di Gobierno di Aruba tin un interes di 6.5%. Tampoco tin un plan of un bista con Gobierno ta activamente reduciendo su gastonan, cual ta un parti di e Landspakket, cu tabata un rekisito pa haya e sosten financiero den pandemia. E meta di e Landspakket ta pa eherce reformanan berdadero na nos isla, sigurando un miho futuro social, economico y gubernamental. Nos tin cu percura pa Aruba su economia crece pa asina Aruba completo por gara mas forsa economico den algun aña. Esaki mester pasa sin extra medida cu hustamente ta tranca crecemento di nos economia y nos poder di compra.
ATIA
Aruba Trade and Industry Association (ATIA) a wordo funda na aña 1945 y ta e organisacion principal cu ta representa e empresanan, e empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association.
