Otro aña drs. Melissa Pichardo-de Meza lo ocupa e funcion di presidente di “Asosiashon Mediko di Antias”. E ta promoviendo su mes den medicina specialisa, despues di a caba cu su estudio basico di dokter. Mescos cu ne, decenas di otro studiantenan y hasta esunnan cu a caba nan estudio caba den ramo di cuido, ta den e asociacion aki, pa esun yuda e otro.
E directiva nobo, cu e miembronan a scoge ayera, ta consisti di 7 miembro y ta prome biaha den historia, tur ta hende muhe. Di e 7 miembronan di directiva, no menos cu tres ta procedente di Aruba…tambe un hecho historico! E presidente di AMA desde otro aña lo ta Melissa de Meza, vice-presidente ta Katherine van Ierland, vice-presidente externo ta Aveline Figaroa, secretario ta Stephany Krips, tesorero ta Genevieve Hernandez, miembro di directiva general pa relacionnan publico ta Dasha Dubero, mientras cu miembro di directiva general pa eventonan ta Dagnery Pikerie.
Di e directiva nobo, e tres Arubianonan eyden ta:
- Melissa Pichardo-de Meza, specialisando den un combinacion di oncologia y dermatologia
- Aveline Figaroa, a caba di studia pa basisarts y ta preparando pa sigui den un specialisacion
- Dasha Dubero, a studia pa boticario
E tres Arubianonan aki, cu awor tin luz riba nan debi na nan envolvimiento den AMA, ta bini di famia conoci riba nos isla. Asina Melissa Pichardo-de Meza, ta e yiu mayo di miembro di parlamento ing. Mike de Meza y su casa dokter di cas, Brigitte de Meza-Every. Aveline Figaroa ta yiu muhe di e ex-director di DOW y APA, Ing. Jossy Figaroa y su casa, presidente di Banco Central di Aruba, Jane Figaroa-Semeleer. Dasha Dubero ta yiu di e pareha Michael Dubero y Evelyn Dubero.
A funda “Asosiashon Mediko di Antias” (AMA) na october 2017 cu e meta pa, na un forma eficiente, acopla e demanda pa profesionalnan den cuido den Cariba Hulandes, na e capacidad di profesionalnan disponibel for di Hulanda. Ta consisti di profesionalnan di cuido, cu un estudio universitario, procedente for di sea Aruba, Boneiro, Corsou, Saba, Sint Maarten of Sint Eustatius. Un di e otro metanan di e asociacion ta tambe pa, den cooperacion cu Gobiernonan di e islanan of e Hospitalnan, pa crea y facilita cuponan pa sigui studia y specialisacion, den ramo di cuido, cu lo kier regresa nan isla natal pa imigra y inverti.
Tambe e asociacion tin como meta pa promove futuro cooperacion den cuido, door di organisa actividadnan social, tayer y charlanan pa y door di futuro profesionalnan di cuido, cu lo por traha den Caribe Hulandes. E asociacion ta aporta den haci conocemento medico mas accesibel pa un publico mas grandi, danki na e sosten y cooperacion di nan patrocinadonan.
