Nathan Legger ta un Arubiano, studiante di cinematografia na London FIlm School, Inglatera. P’e ultimo tres aña, e ta haciendo su Master’s Degree. Despues di a studia cuater aña na Florida, el a sigui su curason y a sigui studia cinema. Aworaki e ta den su ultimo semester , e ta filmando su ‘graduation film’, na Aruba mes.
Nathan ta sigui splica cu e siman cu ta bin lo bay tin 10 persona for di su scol mes na Aruba. Nan lo ta filmando su proyecto final.
Tin cuater persona mas cu lo yuda pa loke ta iluminacion for di Aruba mes, ya cu nan ta compronde e luz y temperatura, loke cu na Inglatera nan no ta custuma cu ne. Tambe lo tin ekipo cu ta saliendo for di Merca pa nan por haci e pelicula aki den un miho calidad y e miho nivel posibel.
E ‘shortfilm’ cu Nathan lo haci ta bay riba doño di un restaurant na Aruba. Ta sigui e doño durante un dia, na momento cu e haya sa cu por ta e lo perde e luga, si nan no cuminsa maneh’e miho. Rib’e dia ey e ta dicidi cu lo haci lo miho pa mustra cu mester keda n’e luga. Tur cos cu por bay fout, ta bay fout. Aki ta sigui e doño y mira kico ta pasa den su bida y su lucha ora cu nan ta doño, manager of supervisor na Aruba.
E motibo pakico a scoge Aruba y no London, ta pasobra desde cu Nathan tin 4 aña su mayornan ta doño di restaurant y el a biba y mira hende den restaurant henter su bida.
E no ta un carera cual e kier scoge pa su futuro, pero si e por aprecie y e sa cuanto amor, pasion y lucha ta bay pa keda cu un restaurant habri, vooral riba un isla cu 80% di e entrada ta turismo. A base di esey a basa e ‘shortfilm’. Nathan a dicidi di papia y skirbi un storia riba algo cu el a experencia henter su bida.
CON POR APORTA
Nathan a splica cu e pelicula aki ta conta un storia p’e mes, un storia cu e kier mira riba pantaya grandi, pero tambe e kier conta un storia cu hende por relaciona nan mes cu ne. En particular e Arubianonan. Tambe e kier traha un storia cu hende rond mundo por relaciona nan mes cu ne. Cu e proyecto aki, ta un proyecto final pa scol, pero ta trat’e como un pelicula oficial cu kier trece pa festival di cine, cual ta su carta pa drenta e industria di cinema na London y rond mundo. Ta tratand’e cu hopi cariño y respet pa hacie miho posibel.
E miho manera p’e Arubianonan por sostene e proyecto aki pa trece Aruba n’e resto di mundo, ta haciendo un recaudacion di fondo. Haciendo pelicula ta costa hopi placa. Esaki ta tumando luga riba ‘kickstarter’, unda cu ta purba di recauda mas placa posibel pa por haci e pelicula aki posibel.
Tin seis dia mas riba kickstarter pa por yega n’e resto di placa cu tin mester. Ainda falta un tiki mas di 8 mil dollar. E unico problema ta cu si no logra yega n’e meta dentro di seis dia, no ta haya ningun placa recauda asina leu. Esey t’e unico dificultad cu ta bin cu e parti di recaudacion di fondo. Ta haciendo lo posibel pa haya sponsor y hende cu ta interesa rib’e isla cu por haci donacion y sostene e arte y hiba Aruba p’e resto di mundo.
Si un persona ta interesa, Nathan lo aprecia esey hopi. Y si no tin ningun placa pa haci donacion, un share of like riba Instagram y Facebook tambe lo yuda hopi.
E proyecto yama ‘Un Dia’, cual por hay’e riba medio social y tambe tur sosten cu por haya, Nathan lo aprecia esey.
Pa por aporta, por bay riba e siguiente link: https://www.kickstarter.com/projects/undiashortfilm/un-dia-short-film
