Despues di seis aña, awe e premio grandi di Lotto 5 a alcansa e bunita suma di dos miyon florin. Un rato pasa director di Lotto di Aruba, Ronald van den Berg a confirma cu tin un solo cumprado cu a gana e bunita premio aki awe. El a cumpra e ticket ganado na Manton Lottery na Sabana Basora.
E numbernan ganado di Lotto 5 awe ta: 20-30-05-23 y 19. Joker: 01 – Letter: G. E prome premio awe nochi ta di Afl. 2.000.000,00. “Mi por confirma cu un solo persona a gan’e. Mi no por bisa ainda si ta number propio of ta un Lotto Loco”, asina Ronald van den Berg a afirma.
E prome y ultimo biaha cu e wega di Lotto 5 a alcansa un premio di 2 miyon florin tabat seis aña pasa, esta na aña 2015. E record di Fundacion Lotto pa Deporte tabata un sorteo di Mini Mega Plus di algun aña pasa cu a yega di alcansa 3.7 miyon florin.
Pa Lotto di Aruba, nan ta masha gradici na pueblo di Aruba cu semper a sostene e fundacion. Nan sa cu e placa ta bay bek den deporte y cu e compania tras di e loteria ta solido y cumplido. No tin nada mas importante pa sa cu e organisado di e loteria por paga bo ora bo gana. E confiansa ey ta biba bou di tur cumprado di Lotto di Aruba. Nan ta consciente cu, por ehempel, e ganado di awe nochi por yega dialuna trankil cu su ticket ganado y cobra su premio di dos miyon florin sin ningun problema.
