Diahuebs e di 33 Congreso di InterExpo a continua, caminda cu lider di oposicion, mr. Mike Eman, a tene un presentacion riba e Sociaal Cultureel Plan Bureau.
Simone Filippini, Presidente di e Asociacion Hulandes di Nacionnan Uni, a cuminsa na bisa cu ta necesario pa cuminsa traha riba e desaroyo social-economico na Aruba pero tambe e problemanan di e isla. Aruba ta forma parti di e ‘small island development states’. Den su experiencia riba tereno di desaroyo, e ta na altura cu ta dificil pa e islanan aki ta hopi dificil pa organisa nan mes, debi na e tamaño di e poblacion y tur e institucionnan cu mester tin, pa cual e ta haya importante e punto treci dilanti pa Eman.
A pesar cu e ta bin di Hulanda, pero e sinti su mes conecta cu e poblacion di e parti Caribense di Reino. Esaki ta door cu el a traha tambe na Miami, cerca e Consul General pa Reino Hulandes, cu ta responsabel p’e Relacionnan Comercial y di Inversion. E tempo ey el a organisa un bishita pa Eman na Florida y di su banda e tambe a bishita riba un otro conferencia na Aruba. Aki el a constata cu Aruba tin hopi posibilidad riba tereno di innovacion, pa bira un isla ehempel den su sorto, como un ‘small island development state.’ Innovativo, progresivo, pa semper ta un stap dilanti na momento cu ta trata di desaroyonan nobo, cual ta di aprecia.
Como presidente di e Asociacion Hulandes di Nacionnan Uni, e kier traha riba un Asociacion di Reino, pa cual el a reuni riba e tema aki cu e representantenan di Corsou y St. Maarten. Pa esaki e kier involucra e hobennan, no solamente di Hulanda, pero tambe e hobennan di e islanan cu ta studiando na Hulanda, pa wak si por tin contactonan inspirador entre e hobennan di e islanan y e hobennan Hulandes, y tambe con pa involucra tambe e mundo comercial den esaki.
