Arubaanse Voetbal Bond – AVB ta anuncia cu ms. Dyane Wiersma lo ocupa e posicion di Secretario General nobo. Cuminsando oficialmente 1 di februari, Dyane lo trece su experticio, pasion y exito contundente cu el a demostra durante su rol como Women’s Football Coordinator.
Dyane Wiersma lo reemplasa secretario general saliente Hubert Solagnier. Si nos no ta ekiboca, ta pa prome biaha den historia di e directiva di AVB, e posicion di secretario general ta keda ocupa pa un hende muhe. “Di aki banda nos kier a desea Dyane hopi exito den su funcion nobo.”
TOCANTE DYANE
Despues di gradua for di Colegio, Dyane a sigui su estudio na Hulanda unda a obtene su bachelor’s den IBMS. Despues di haci su stagenan den hospitality industry, a cuminsa su carera professional den turismo pa un periodo di 4 aña. Durante pandemia el a perde trabou, pero danki na Dios ora un porta cera otro porta ta habri.
Pa su suerte e posicion di Womens Football Coordinator a habri net e periodo aki y asina a cuminsa su carera den mundo di Futbol como coordinadora di Footbal Femenino. Pa hopi tempo esaki tawata tin poco atencion y asina su prome tarea tawata pa engradece esaki y den transcurso di tres aña, sigur por a mira un engradicimento den locual ta futbol femenino y tambe den resultado nan di nos seleccionnan femenino.
Na 2022, Dyane a ricibi un extra funcion di FIFA Forward coordinator, caminda e por a haya hopi conocimento riba e aspecto di fondonan cu ta ricibi di FIFA y tur procedura y rekesito cu mester cumpli cune, e funcion aki sigur a dun’e un conocemento un tiki mas extenso cu sigur tambe ta dun’e un bentaha den su funcion nobo di GS.
Dyane: “Futbol semper tawata mi passion, desde chikito practicando esaki den bario cu mi primonan y desde mi 14 aña mi a cuminsa hunga oficial na un club, y tambe despues representando Aruba den diferente seleccion nan como hungador y Capitan.”
SENTIMENDO DI E NOMBRACION
Esaki no tawata un desicion facil pa Dyane, mirando cu e puesto aki ta bin cu hopi responsabilidad y no ta uno asina facil pa maneha. Despues di delibera cu su famia y esnan cerka, el a dicidi di tuma e reto aki pa asina por sigui contribui na e deporte. “Mi ta sumamente agradecido na President y Directiva di AVB pa deposita nan confiansa den mi persona y sigur ta look forward pa traha cu nos staffnan dedica pa engradece Futbol,” Dyane ta bisa.
Como hende muhe, Dyane ta expresa cu sigur ta un honor pa haya nombracion den un posicion asina vital y importante. Dyane ta mama di dos yui muher pues e kier ta un role model pa nan, y educa nan cu nada ta imposibel si bo tin e passion y gana. Cu dedicacion, perserverancia y trabou duro, bo por logra tur cos cu bo pone como meta. “Mi ta spera cu esaki por habri caminda tambe pa inspira mas hende muhe pa envolucra nan mes den deporte di futbol.”
PUNTONAN DI SALIDA PA MEHORA FUTBOL
Nos futbol actual sigur no ta mesun caminda cu algun aña atras. FIFA ta brinda hopi sosten y AVB su Federacion ta sigui crece, basa riba exigencianan di FIFA y desaroyonan internacional. “Honestamente, nos futbol den mi bista a mira cosnan positivo, pero hopi ta semper ta critica so sin mira e bon nan tambe cu tin. Sigur cu tin area nan cu por bai mihor y lo mi bai traha riba esakinan.”
E ultimo añanan, vooral den e parti di competencia internacional, ambos seleccion hubenil, seleccion masculino/femenino a mira resultado positivo cu algun historianan marca. Academianan di AVB, cu nos ta un di e islanan chikito den Caribe cu tin tanto categoria, brindando oportunidad nan na nos talentonan local. Aruba ta un di e tiki islannan den Caribe cu tin un competencia organisa pa medio di Federacion cu tanto categoria.
“Sigur nos tin puntonan pa mehora, como GS primordialmente tin cosnan internamente cu mester structura y drecha prome pa tin un base solido y despues pa asina bay externo cu stakeholders.” Recientemente cu e proyecto di Technical Coordinators den diferente club, ta existi un comunicacion mas di cerca awo entre AVB y Clubnan.
“Den puesto nobo sigur mi mester bay sinta cu President pa asina por ricibi informacion riba diferente cosnan cu ta pendiente, y Proyecto pa wak kico tur mester atencion, mirando cu den mi puesto di WFC mi tarea tawata uno diferente,” Dyane ta splica. Como hoben professional sigur lo tin desafio, obstacula y contratiemponan pero mester ta semper dispuesto pa siña.
Dyane ta conclui cu un cos ta sigur, mester brinda espacio pa nan por traha, tin proyecto y cosnan bunita pa nos futbol cu no ta pasa di awe pa mañan pero por premira cu pronto esakinan lo bira realidad.
