Aruba Taekwondo Associacion (ARTBO) ta orguyoso di anuncia e regreso di su atletanan talentoso for di e prestigioso US Open na Reno, Nevada. Lidera pa e entrenador oficial di seleccion Nacional di Aruba Taekwondo, Teo Rodriguez, e team a duna un presentacion remarcabel, treciendo cas un medaya di brons y mustrando un curason y determinacion grandi durante henter e competencia.
Mientras cu e presentacion impresionante di Raymara Blanco a sigura un brons hopi mereci den su division, e berdadero realce di e torneo tabata e spirito di tur e atletanan Arubano. Enfrentando oponentenan renombra, ningun di nos atletanan a hala atras. Nan a lucha cu curason y honor, mustrando nan dedicacion y talento den cada parti.
Aunke no a logra tur e metanan den e torneo aki, e experiencia gana ta di un balor grandi. “Nos atletanan a duna un declaracion poderoso – Aruba ta presente den e mundo di Taekwondo, y nos ta aki pa competi na e nivel di mas halto.”
ARTBO ta extende su felicitacion cordial na tur e atletanan participante cu a demostra spirito deportivo y resiliencia remarcabel. Nan dedicacion y trabao duro ta un inspiracion pa tur e atletanan hoben Arubano.
ARTBO tambe ta extende su felicitacion cordial na coach Teo Rodriguez pa su liderazgo excepcional y preparacion di e atletanan, tanto di Tiger Taekwondo Academy como di Estrella Taekwondo Center. Su guia durante henter e biahe aki a contribui di un forma significativo na nan tremendo presentacion den e evento grandi aki.
Finalmente, ta aplaudi e delegacion completo cu a acompaña e atletanan na US Open. Mayornan, asistentenan, y coachnan – boso sosten y animacion grandi a hunga un papel crucial den nan exito.
E experiencia di US Open aki a bira un hito significativo pa Aruba Taekwondo. “Nos ta increiblemente orguyoso di tur nos atletanan, coachnan, y sostenedornan. Nos ta wardando cu ansiedad pa construi riba e momentum aki y logra un exito ainda mas grandi den futuro. Felicitacion na e atletanan hoben di Taekwondo cu a representa nos riba escenario internacional: Nicole Tromp; Aleysha Macea; Dary-en Morel; Janoah Ridderstaat; Kaydion Kelkboom; Khaleesy Ridderstaat y Raimara Blanco
ARTBO ta keda comprometi na fomenta y nutri e talento di nos atletanan hoben, dunando nan e poder pa logra nan soñonan y sigui trece orguyo pa Aruba riba escenario internacional.
