Aruba ta sigui capta atencion di e comunidad Peruano y e bishita mas recien di Jordan Schlipken Croes, director di ATA Latino America, ta un confirmacion cla. Durante su estadia na Peru, Schlipken a reuni cu varios medio di comunicacion, operador turistico y diferente agencia di biaha na Lima, asina consolida e interes mutuo. Nos “One Happy Island” Aruba ta sigui hala atencion di e comunidad Peruano.
Te cu awo, Aruba a ricibi un cantidad di 3.120 bishitante marcando un crecemento di 49% compara cu aña 2022. E aumento aki ta representa un 89% di recuperacion compara cu aña 2019, destacando e conexion fuerte cu Aruba tin cu e mercado Peruano.
E crecemento aki no ta djis un casualidad. Aruba ta traha incansablemente pa por ofrece su bishitantenan experiencia nobo y emocionante. E apertura di mas camber di calidad halto, evento y actividad durante henter aña y e reciente anuncio di vuelo directo di LATAM entre Aruba y Lima ta varios elemento cu a duna un impulso na e comunidad Peruano pa scoge e destinacion aki den Caribe.
“Nos gusta menciona cu Aruba ta un destinacion premium pero toch accesibel. E no ta un destinacion masivo, pues semper tin trankilidad na lama. E isla ta busca pa mantene su esencia como un destinacion pa desconecta”, asina Jordan Schlipken a menciona durante su bishita.
Delegacion di Aruba
Schlipken tabata compaña pa un delegacion di 9 socio strategico di Aruba cu ta sumamente importante pa posiciona e destinacion den e mercado Latino Americano: Jerusha Rasmijn Director di Aruba Convention Bureau, Milly Paskel y Tatiana Valencia di First Class Experience Aruba, Martha Noreña y Angelo Tromp di De Palm Tours, Jorge Castillo di Divi Hotels, Björn Vrolijk di Embassy Suites by Hilton, Diego García di Hotel Hilton Aruba y María José Lizama, representante di ATA pa Peru y Chile. Hunto nan a presenta e novedadnan cu Aruba tin pa ofrece.
Experiencia nobo
E conexion aereo directo proporciona pa LATAM a facilita e caminda pa e Peruanonan cu tin e deseo pa explora nos isla maraviyoso. E ruta nobo aki no unicamente lo haci e distancia uno mas cortico sino ademas lo simplifica e proceso di biahe, brindando un experiencia mas comodo. “E operacion nobo cu lo inicia dia 2 di december cu tres vuelo pa siman: diahuebs, diasabra y diadomingo ta un reto pa sigui aporta na e desaroyo turistico y comercial di e pais”, asina Cristina de Melo, Gerente Comercial di LATAM Airlines Peru a duna di conoce.
Aruba tin mas pa ofrece
Aruba a amplia su oferta di estadia di prome nivel cu e apertura di hotel nobo manera Embassy Suites by Hilton y proximamente St. Regis Resort cu 220 camber luhoso. E diversidad di opcion di estadia ta garantisa cu e bishitantenan Peruano lo haya e luga perfecto segun nan necesidad y preferencia.
E variedad di evento y actividad na Aruba ta igual di impresionante, brindando e bishitantenan un cantidad grandi di opcion pa enrikece nan estadia. Desde lama bunita te cu un escena gastronomico impresionante, evento cultural y e trankilidad di un ambiente sigur, Aruba ta ofrece diferente oportunidad pa crea momento inolvidabel.
Meta pa 2023: Crece e mercado
E meta pa aña 2023 ta pa fortalece e presencia di Aruba den e mercado Latino Americano y mantene un crecemento constante. Ta spera cu, danki na e conexion aereo directo y e propuestanan turistico atractivo, e cantidad di bishitante Peruano cu scoge Aruba como nan destinacion preferi sigui aumenta. Schlipken a enfatisa e importancia di e siguridad y trankilidad cu Aruba ta ofrece, nan ta factor clave cu ta atrae e Peruanonan en busca di un destinacion agradabel. Ademas, e posibilidad di disfruta e solo cayente 360 dia pa aña, sin yobida, sin alga ni horcan, ta haci Aruba un luga ideal pa un vakantie inolvidabel.
Fin di aña lo tin vuelo directo
E siman di actividad a termina cu un evento di cocktail na e balcon di e hotel Pullman Miraflores, den colaboracion di e aerolinea LATAM. Durante e evento aki oficialmente a presenta e vuelo directo Lima-Aruba, estableciendo un conexion directo entre ambos destinacion. E anochi a continua den un ambiente ameno y festivo, den presencia di e agencianan di biahe, e operadornan, influencers y e miembronan di prensa local. Asina, Aruba Tourism Authority Latino America a reafirma su compromiso di fortalece e lasonan turistico entre ambos pais, brindando e biaheronan Peruano e oportunidad pa descubri e beyesa y autenticidad di Aruba.
