En conexion cu Associate Appreciation Week 2023 e asociadonan di Aruba Marriott a bishita Santa Rosa riba e di dos dia di celebracion. Miltiza Oduber-Gietel, Director Human Resources Operations na Aruba Marriott Resort & Stellaris Casino, a splica cu e asociadonan tabata na Santa Rosa pa ehecuta un proyecto di plantacion.
Aruba Marriott su asociadonan a adopta un area na Santa Rosa y hacie completamente limpi. Ademas nan a planta mata nobo di fruta, e area aki ta hiba e nomber di ‘Hofi Aruba Marriott’ y e intencion ta pa keda mantene e area aki den Santa Rosa. Cada cierto cantidad di luna Aruba Marriott lo bolbe Santa Rosa pa sigui mantene e area y cosecha.
Miltiza Oduber-Gietel a comenta cu e parti mas special di e dia ta na momento cu tur departamento yega hunto pa duna bek na nos comunidad. Pa Aruba Marriott un di su balornan nucleo ta pa duna bek na comunidad. Aruba Marriott ta consider’e un ascpecto importante y e echo aki ta fortalece e trabou den team. Tipo di proyecto asina ta enrikece e organisacion y ta yena Aruba Marriott cu hopi orguyo.
For di 7:00 di mainta caba e asociadonan tabata presente na Santa Rosa. E bus a sali 6:30 di mainta for di Aruba Marriott pa hiba e asociadonan Santa Rosa. E team a consisti di asociadonan di varios departamento entre otro departamento di engineering, grounds, Food & Beverage, Casino, Human resources y mas. Asina a demostra cu tur hende ta dispuesto pa duna bek na comunidad.
E mensahe di Aruba Marriott ta pa mas compania cuminsa den tipo di proyecto asina pa duna bek na comunidad, asina por sigui crece como isla.
