Aruba Marriott recientemente a organisa un mainta inspirativo y informativo pa 95 studiante di John Wesley College y Mon Plaisir Mavo y Havo pa asina motiva nan pa un dia forma parti di e industria hotelero.
Durante e evento aki, lider nan di diferente departamento a hasi un presentacion cortico di 5 pa 10 minuut pa asina comparti cu e grupo di studiante nan trayectoria y experencia di crecemento professional dentro di e industria hotelero.
Ademas di e presentacion nan, Aruba Marriott a prepara un treat di desayuno special pa e studiante nan den nan Grand Ballroom pa asina inicia e mainta cu hopi animo na Aruba Marriott.
Por medio di iniciativa nan manera esaki, Aruba Marriott ta inverti den programa nan di colaboracion pa asina desaroya abilidad nan importante di hospitalidad entre e hoben nan den nos comunidad local y prepara nan pa un futuro exitoso dentro di e industria.
E vitalidad di mucha y hoben nan ta esencial pa e stabilidad y exito di cada comunidad, cual ta e rason pakiko Marriott ta hasi esaki un prioridady asina lidera positivamente e caminda pa sostene mucha y hoben nan dentro di e comunidad unda Marriott su hotel nan ta opera.
Mas di Aruba Marriott:
Aruba Marriott Resort & Stellaris Casino a habri na aña 1995 cu 411 camber y despues a añadi 3 camber mas na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. En total, e famia di Aruba Marriott ta consisti di mas o menos 1200 empleado den servicio directo. E compleho di Aruba Marriott ta esun di mas grandi den henter Caribe, tanto den cantidad di camber como den cantidad di empleado.
