Den un rueda di prensa cu a tuma luga na Aruba Racquet Club, Tai Foo Lee, secretario di Aruba Tennis Bond, a destaca riba e antesala di dos torneo consecutivo (Back2Back) di gran embergadura: E Torneo Internacional di Tennis pa hoben U-14 y U-18, cu participacion di varios pais.
Actualmente ta disputando diferente partido den e categoria U-14, cu presencia destaca di talento local. Lee a extende un invitacion caluroso na tur e habitantenan di Aruba, amante di tennis y e publico en general, como tambe famia y amigo di e hungadonan pa nan join n’e actividadnan cu lo tu a luga den e proximo simannan na Aruba Racquet Club,
E weganan lo tuma luga durante henter dia y e orarionan lo ta disponibel riba e pagina di Facebook di Tennis Aruba, maneha pa Thessaly Zimmerman, e persona encarga cu relacion publico. E lo sigura pa un cobertura completo y lo permiti pa tur hende ta informa riba e orari y e partidonan specifico di interes.
E inscripcionnan ya ta habri pa categoria U-18, cu ta inclui hungado di varios pais manera Mexico, Merca, Hulanda y Corsou, fuera di e talento a local cu lo ta disponibel pa wega parti atardi.
Franz Sydow, presidente di Aruba Tennis Bond, tambe a comparti cu e eventonan aki ta parti integral di e esfuersonan continuo pa promove tennis den e region. El a subraya e importancia di e torneonan aki p’e desaroyo deportivo y personal di e hobennan tenista.
El a gradici e sosten di e minister di deporte y minister di turismo, kende fuera di esey ta un entusiasta di tennis y ta un deportista. Sydow a enfatisa cu participa den e deporte ta fundamental pa cultiva balor manera discipliina y preserverancia, esencial pa forma individuo ehemplar den comunidad.
Fuera di esey, el a menciona e Internacional Junior Challenge Championship, cu ta celebrando su di 35 edicion como un evento destaca den Caribe, cu participacion di mas di 80 participante di 15 pais. E torneo aki ta proporciona un plataforma invaluabel p’e hobennan gana experiencia na nivel internacional, fomentando nan crecemento, tanto den tennis como den nan desaroyo personal.
Por ultimo, el a destaca e colaboracion fructifero cu Subway, cu su sosten constante tabata clave p’e exito di e eventonan aki. E bond ta comprometi pa sigui desaroya deporte na Aruba y pronto lo comparti nan plannan pa futuro p’asina fortalece e comunidad tenistico local ainda mas.
