Aruba Certification Program kier extende un caluroso palabra di gratitud na tur su partnernan cu a sa di sostene e programa durante e ultimo añanan, en especial durante 2017 unda e programa a pasa den un periodo di transicion y fase di crecemento. Durante e aña aki a extende e programa y a pone enfoke extra riba e aspecto di e capital humano y profundisa conocemento di e producto Aruba; e historia y cultura di nos pais.
Enfoke riba capital humano ta sumamente importante pa Aruba Certification program. Nos pais ta conoci pa su hendenan amabel y hospitalario. Dor di pone e hende central y duna atencion na e balor agrega di su esfuerzonan y dedicacion Aruba Certification Program ta sigui trendnan internacional unda den e mundo di hospitalidad ta mira e persona cu ta traha den e industria turistico como e motor di por crea e experiencia autentico y inolvidabel pa e bishitante.
Aruba Certification Program ta satisfecho cu durante e periodo di 2017 no solamente a sa di exitosamente pasa dor di e fase di transicion y mehoracion, pero tambe a organiza diferente sesion di Enfoke cu partners y stakeholders, a laga nos hobennan sera conoci cu historia, cultura y e industria di turismo di nos isla durante un summer camp yama Summer’s School y a tene diferente presentacion pa organisacionan. Tur esaki cu e meta pa trece e programa mas serca di nos comunidad.
E programa a conoce participacion amplio di partner den sector turistico, di tour operator pa restaurant y hotelnan cu a sa di reconoce e importancia di e programa pa cu nan trabou di tur dia y a duna di nan banda cu tempo y presupuesto y a permiti pa nan empleadonan por a sigui e curso di certificacion cu Aruba Certification Program ta brinda.
Aruba Certification Program ta extende tambe un palabra di pabien na e companianan cu den 2017 a ricibi e “100% Certified” award, un reconocemento cu ta wordo duna na companianan cu pa añanan ta mira e importancia di certifica nan empleadonan y cu ta casi si no 100% certifica.
2018 ta bay ta un aña hopi bunita pa Aruba Certification Program. Por informa nos comunidad cu e programa a sera un aliansa cu partnernan renombra international pa asina reenforsa e modulo di servicio.
Ta invita nos comunidad pa keda pendiente pa mas informacion tocante e proximo fase di e programa cu lo sigi contribui na stimula e empeño pa mehora e nivel di servicio excelente na Aruba y sigui reenforsa e amor cu cada un trahando den e sector di turismo tin pa nos pais.
