Recientemente tabatin un publicacion den Landscourant. Nan ta menciona e cantidad di biyetenan di florin Arubano cu ta den circulacion. Y den esaki por a tuma nota cu ainda tin hopi biyete “bieu” riba caya.
Papiando specificamente di e biyetenan di e serie 1990 / 1993, por nota cu tin un total di 403.138 di nan den circulacion. A base di loke banco a produci, kitando loke cu a debolbe ta resta cierto cantidad cu supuestamente ta riba caya. Kisas tin di nan cu a perde of a kibra pa cual lo no haya nan nunca mas.
Ta papia aki di 367 biyete di 500 florin. E denominacion di mas grandi cu ta riba caya ainda ta esun di 5 florin di cual tin 175.576 cu no a yega Banco Central bek. Despues tin esun di 10 florin cu tin 153.687 di nan riba caya. Esunnan di 100, 50 y florin ta algun mil nan ta.
En total ta papia aki di 6.227.675 florin na biyete cu ta riba caya.
Tin biaha ta sosode cu hende grandi ta sconde placa y no sa unda nan ta keda. Si cualkier persona tin biyete bieu, di e serie ariba menciona, nan tin te cu 31 di januari, 2034, pa entrega nan y haya biyete nobo a cambio.
E siguiente serie di biyete cu lo vence ta esnan poni na 2003 den circulacion. Y nan ta vence dia 12 di augustus, 2049.
Di e serie aki tin 9.552 biyete riba caya y mayoria ta di e biyete di 100 florin (4556 en total) na un balor di 7.662.800 florin.
Pa loke ta e biyete di mas nobo, cu ta data di 2019, segun Banco Central, den aña 2023 a destrui 768.971 biyete balora na 35.867.755 florin. Loke cu a keda den circulacion tabata 4.283.306 biyete, di diferente denominacion, balora na 299.719.695 florin.
Di e serie di 2003 a destrui den aña 2023 un total di 9552 biyete ( cu un balor di 578.030 florin). Di e serie aki a keda den circulacion of riba caya, 541.997 biyete y cu un balor total di 15.727.450 florin.
Pues si conta tur e biyetenan di añanan 90, 2003 y 2019 cu ta den circulacion, e cantidad di placa total cu Banco Central tin riba caya den e diferente biyetenan ta mas cu 320 miyon florin den circulacion.
Pa loke ta moneda tin 119.536.011 den circulacion y na balor e ta 40.513.595,45 florin. Pues total e ta yega mas o menos 400 miyon florin den tanto biyete como moneda.
.
