E cantidad di casonan di covid-19 a keda para riba 14 y pa gobierno esaki ta hopi bon despues di 26 dia cu nos fronteranan a habri. Segun minister di salubridad publico, deporte y turismo, Dangui Oduber, manera ta conoci a habri fronteranan desde 1 di juli cu Europa.
Sigui pa e reapertura cu Merca. Desde 1 di juli a ricibi mas di 11 mil turista. E weekend cu a pasa tabata e di tres weekend desde cu a habri fronteranan cu tiki caso di covid-19. Gobierno ta satisfecho cu e prome dianan cu ta bayendo. E madatario a splica cu a test tur turista y e fin di siman cu a pasa, no tabata tin ningun caso positivo. Te asina leu no tin transmision local y casonan cu mester a wordo interna y tur esnan activo ta rlativamente bon di salud. Esaki ta un perspectiva cu ta sigui pa reactiva nos turismo y economia.
Ta pesey e protocolnan cu tin in place pa turista y localnan y tambe pa negoshinan ta importante pa por mantene e disciplina vigente y mantene e fronteranan habri. Turistanan ta sumamente satisfecho y contento cu protocolnan. Tambe a introduci un seguro obligatorio, cual na prome instante hopi a custiona, pero awo e turistanan ta aplaudi esaki. E parti di testnan mandatorio e turistanan ta aplaudi.
Na Merca e proceso pa haci un PCR test ta dura hopi prome cu haya e resultado. Na Aruba e ta bay relativamente hopi lihe, cual turistanan ta comparti riba rednan social. A introduci un Aruba Health App tambe. Turistanan ta download esaki prome cu yega Aruba. E ta gelink na e PCR test cu nan ta haci na aeropuerto. A midi tempo cu e test aki a dura y e ta bay lihe. E ta wordo haci entre 1 y 3 minuut. Importante ta cu e PCR ta wordo haci cu dentro di 7 ora, e turista ya caba ta haya su resultado.
Algo sigur cu ta haci Aruba e pionero den lansamento di e aplicacion aki. E app aki ta percura pa e turista warda menos na aeropuerto. Tur informacion riba covid na Aruba ta riba e app aki. Tambe e tin tur informacion riba Aruba Health and Happiness Code, caminda e turista por wak e seyonan cu e negoshinan na Aruba tin. Hopi ta e establecimentonan cu a registra y awo e siguiente fase ta sigui segun e cumplimento cu tin.
Turistanan ta hopi gradicido cu na momento cu nan yega nan ta haya resultado di nan test y mayoria di e turistanan cu a yega, a test negativo. E minister ta spera cu lo por mantene asina. Gobierno ta satisfecho y contento con e ta bayendo. Ta importante pa nos recuperacion economico y tambe di nos turismo. Te asina leu, ta hopi gradicido con e ta bayendo y ta spera cu por mantene esaki, dependiendo di e comportacion di nos ciudadanonan, e disciplina cu nos keda demostra y tambe e control di e taskforcenan pa loke ta esaki.
Pais Aruba a demostra e curashi pa dicidi pa habri nos fronteranan, tabata consecuente cu e protocolnan. A mira otro paisnan den Caribe cu a habri nan frontera, pero a cera nan bek. E protocolnan cu nos tin in place a wordo demostra ta dunando resultado ta esunnan corecto cu nos por mantene nos fronteranan habri.
